اسلام آباد ( پاک ترک نیوز) حج پورٹل کے ذریعے نجی حج سکیم کے 11 ہزار 600 عازمین کی بکنگ مکمل ہوگئی ہے، جبکہ نجی حج سکیم کی 60 ہزار نشستیں تاحال دستیاب ہیں۔ترجمان وزارت مذہبی امور کے مطابق حج پورٹل پر منظم حج کمپنیوں کی جانب سے کم خرچ، معیاری اور اعلیٰ درجے کے حج پیکیج دستیاب ہیں۔ترجمان نے بتایا کہ حج پورٹل کے ذریعے 25 منظم حج کمپنیوں کے کھاتوں میں واجبات کی مد میں 10 ارب روپے موصول ہوچکے ہیں، جبکہ قومی اطلاعاتی ٹیکنالوجی بورڈ کے تیار کردہ حج پورٹل کے ذریعے 4 ارب روپے سے زائد رقم آن لائن جمع کرائی گئی ہے۔
یہ بھی پڑھیں: پاکستان کی حوثی حملوں کی مذمت، سعودی عرب کے دفاع کے حق کی حمایت
وزارت مذہبی امور نے عازمین حج کو خبردار کیا ہے کہ حج واجبات کی ادائیگی کے لیے صرف پاک حج درخواست یا حج پورٹل استعمال کیا جائے۔ترجمان نے کہا کہ عازمین حج کسی غیر مجاز فرد یا کمپنی کو براہ راست رقم جمع نہ کرائیں، تاکہ وہ دھوکا دہی سے محفوظ رہ سکیں۔ترجمان کے مطابق نجی حج سکیم کی بکنگ نشستوں کی دستیابی تک یا 20 نومبر تک جاری رہے گی۔
