نئی دہلی (پاک ترک نیوز)بھارت نے تیز رفتار ریلوے کے شعبے میں اہم پیش رفت کرتے ہوئے اپنی پہلی مقامی بلٹ ٹرین کی تیاری شروع کردی ہے۔ یہ ٹرین بنگلورو میں بھارت ارتھ موورز لمیٹڈ کے کارخانے میں تیار کی جا رہی ہے، جسے ممبئی احمد آباد ہائی اسپیڈ ریل کوریڈور پر چلانے کا منصوبہ ہے۔
بھارتی وزارت ریلوے کے مطابق آٹھ بوگیوں پر مشتمل یہ ٹرین 202 کلومیٹر طویل ہوگی، جبکہ اس کی آزمائشی رفتار 280 کلومیٹر فی گھنٹہ اور تجارتی رفتار 249 کلومیٹر فی گھنٹہ مقرر کی گئی ہے۔ ٹرین میں مجموعی طور پر 557 مسافروں کی گنجائش ہوگی۔
ٹرین میں چار موٹر کاریں اور چار ٹریلر کاریں شامل ہوں گی۔ سات بوگیاں اسٹینڈرڈ کلاس جبکہ ایک بوگی ایگزیکٹو کلاس کے لیے مختص ہوگی۔ ضرورت پڑنے پر دو آٹھ بوگیوں والی ٹرینوں کو جوڑ کر 16 بوگیوں پر مشتمل ٹرین بھی چلائی جا سکے گی۔
مسافروں کی سہولت کے لیے آرام دہ نشستیں، ایل ای ڈی لائٹس، وائی فائی پر مبنی تفریحی نظام، موبائل اور لیپ ٹاپ چارجنگ پوائنٹس، جدید واش رومز اور ڈیجیٹل معلوماتی اسکرینیں نصب کی جائیں گی۔ اعلانات انگریزی، ہندی اور علاقائی زبانوں میں کیے جا سکیں گے۔
یہ بھی پڑھیں: پاکستان وسطی ایشیائی ممالک کے لیے عالمی تجارت کا اہم تجارتی راستہ بنانے کی پیشکش
خصوصی افراد اور وہیل چیئر استعمال کرنے والے مسافروں کے لیے مخصوص نشستیں، قابلِ رسائی واش رومز، بریل سائن بورڈز اور خصوصی دروازوں کا انتظام بھی کیا گیا ہے۔
ٹرین میں 25 ہزار وولٹ کے برقی نظام کے ساتھ جدید ری جنریٹو بریکنگ ٹیکنالوجی استعمال ہوگی، جس کے ذریعے بریک لگانے کے دوران پیدا ہونے والی توانائی دوبارہ برقی نظام میں شامل کی جا سکے گی۔
اس کے علاوہ جدید ایروڈائنامک ڈیزائن، خصوصی ساؤنڈ انسولیشن اور شور و ارتعاش کم کرنے والی ٹیکنالوجی ٹرین کو تیز رفتاری کے دوران زیادہ آرام دہ بنائے گی۔
