پشاور (پاک ترک نیوز )خیبر پختونخوا اسمبلی میں وزیراعلیٰ پنجاب مریم نواز کے بیان کے خلاف قرارداد منظور کرلی گئی۔ صوبائی وزیر قانون آفتاب عالم نے قرارداد ایوان میں پیش کی۔
قرارداد کے متن میں وزیراعلیٰ پنجاب مریم نواز، رانا ثناء اللہ اور عظمیٰ بخاری کے بیانات کی شدید مذمت کی گئی ہے۔
قرارداد میں کہا گیا ہے کہ دہشت گردی کو سیاسی پوائنٹ اسکورنگ اور الزام تراشی کے لیے استعمال کرنا قومی مفاد کے منافی ہے۔ دہشت گردی کسی ایک صوبے یا علاقے کا مسئلہ نہیں بلکہ پوری ریاست اور قوم کے لیے مشترکہ چیلنج ہے۔
قرارداد کے مطابق دہشت گردی کے خلاف قومی یکجہتی اور پاکستان کی وفاقی وحدت کو نقصان پہنچانے والے بیانات کی مذمت کی جاتی ہے۔
خیبر پختونخوا اسمبلی کی قرارداد میں مطالبہ کیا گیا ہے کہ وزیراعلیٰ پنجاب مریم نواز کے خلاف آئین شکنی سے متعلق قانون کے مطابق کارروائی کی جائے۔
قرارداد میں مزید کہا گیا ہے کہ آئین کے آرٹیکل چھ کے تقاضوں کی روشنی میں ضروری کارروائی عمل میں لائی جائے۔
