لندن(پاک ترک نیوز ) سابق وزیراعظم اور پاکستان تحریک انصاف کے بانی عمران خان کے علاج اور طبی سہولیات کے مطالبے پر دنیائے کرکٹ کے سابق کپتان بھی میدان میں آگئے۔
21 سابق کرکٹ کپتانوں نے وزیراعظم شہباز شریف کے نام خط لکھ کر مطالبہ کیا ہے کہ عمران خان کو بغیر کسی تاخیر کے مناسب طبی سہولیات فراہم کی جائیں، ان کی آنکھ کا علاج کرایا جائے اور اہلخانہ کو ہر ہفتے ان سے ملاقات کی اجازت دی جائے۔
خط میں کہا گیا ہے کہ عمران خان کو ضروری طبی سہولیات فراہم کرنا اور ان کے علاج کو یقینی بنانا انتہائی ضروری ہے۔
یہ پہلا موقع نہیں کہ سابق کرکٹ کپتانوں کی جانب سے عمران خان کے طبی علاج کے لیے حکومت پاکستان سے مطالبہ کیا گیا ہو۔ رواں برس فروری میں بھی 14 سابق کپتانوں نے وزیراعظم کے نام خط لکھا تھا، تاہم اس مرتبہ خط پر دستخط کرنے والے سابق کپتانوں کی تعداد بڑھ کر 21 ہوگئی ہے۔
وزیراعظم شہباز شریف کو لکھے گئے خط میں بھارت کے سابق کپتان سنیل گواسکر، کپل دیو اور دلیپ وینگسرکر بھی شامل ہیں۔
خط لکھنے والے دیگر سابق کپتانوں میں انگلینڈ کے مائیک ایتھرٹن، ناصر حسین، ایلسٹر کک اور اینڈریو اسٹراس، آسٹریلیا کے گریگ چیپل، ایلن بارڈر اور اسٹیو وا، ویسٹ انڈیز کے سر کلائیو لائیڈ، سری لنکا کے ارجونا رانا ٹونگا، نیوزی لینڈ کے جان رائٹ سمیت دیگر سابق کپتان شامل ہیں۔
