عمران خان نے حکومت سے مذاکرات کی تجویز پھر مسترد کر دی

راولپنڈی ( پاک تر نیوز) پاکستان تحریک انصاف ( پی ٹی آئی ) کے بانی عمران خان کے ’’ایکس‘‘ پر جاری کردہ تازہ ترین بیان نے عملاً محمود خان اچکزئی کی جانب سے مذاکرات کی تجویز پھر مسترد کر دی ہے۔
نجی چینل کی جانب سے وزیراعظم شہباز شریف کے قریبی ذرائع کے حوالے سے بتایا کہ 9 مئی کے واقعات اور بانی پی ٹی آئی عمران خان اور پارٹی کے سوشل میڈیا پر فوج مخالف مہم پر اظہارِ ندامت یا معذرت کے بغیر پی ٹی آئی کے ساتھ بامعنی مذاکرات ممکن نہیں۔
پی ٹی آئی کے سیکرٹری اطلاعات شیخ وقاص اکرم نے کہا کہ چونکہ احتجاجی تحریک کی پالیسی براہِ راست عمران خان کی جانب سے آئی ہے لہٰذا وہی نافذالعمل ہو گی۔
ان کا کہنا تھا کہ محمود خان اچکزئی مذاکرات سمیت سیاسی سرگرمیاں جاری رکھ سکتے ہیں، تاہم پی ٹی آئی قیادت عمران خان کی تازہ ہدایات کی پابند ہے۔
سیکرٹری اطلاعات شیخ وقاص نے کہا کہ عمران خان نے وزیراعلیٰ خیبرپختونخوا کو ہدایت دی ہے کہ وہ قانون کی حکمرانی اور آئین کی بالادستی کیلئے احتجاجی تحریک کی تیاری کریں۔