ای وی بس کا منصوبہ کسی صوبے میں نہیں ،شرجیل میمن

کراچی (پاک ترک نیوز ) سندھ کے سینئر وزیر شرجیل انعام میمن کا کہنا ہے پاکستان کی پہلی ای وی بس کوئی اور صوبہ نہیں پاکستان پیپلز پارٹی سندھ میں لے کر آئی، پنک بس سروس جیسی سروس پوری امریکہ، برطانیہ، یورپ،خلیجی ممالک میں نہیں، پنک بسز کی ڈرائیور اور کنڈکٹر خواتین ہیں،مفت میں خواتین کو ای وی اسکوٹیز دے رہے ہیں، سندھ صوبہ میں 150 خواتین کے پاس موٹر بائیک کا لائسنس تھا، اب 20 ہزار خواتین نے ڈرائیونگ لائسنس کے لئے درخواست دی ہے، پورے پاکستان میں کوئی بھی حکومت مفت میں پنک ای وی اسکوٹر نہیں دے رہا،صوبہ سندھ فری میں اسکوٹی دینے کے ساتھ ساتھ ، ہیلمٹ، لائسنس اور تربیت بھی مفت میں دے رہا ہے، اس منصوبہ میں کوئی ڈونر ایجنسی بھی نہیں، کوئی سفارش نہیں، کسی کے پاس جانے کی ضرورت نہیں، جس کے پاس ڈرائیونگ لائسنس ہے، اور ثبوت ہے کہ وہ کہیں کام کرتی ہے تو آپ کو پنک اسکوٹر مفت میں ملے گی،ہم خواتین کو مزید بااختیار بنانا چاہتے ہیں، جو چیئرمین بلاول بھٹو زرداری، صدر آصف علی زرداری اور خاتون اول بی بی آصفہ بھٹو زرداری کا ویژن ہے، پاکستان پیپلز پارٹی کا ویژن، ترقی اور خوشحالی کا ہے، پروپیگنڈہ چلتے رہیں گے، فیصلہ عوام نے کرنا ہے، جب بھی انتخابات ہوئے سندھ کے عوام نے پیپلز پارٹی کو پہلے سے زیادہ مینڈیٹ دیا