کراچی ( پاک ترک نیوز) سندھ کابینہ کا اجلاس آج وزیراعلیٰ سندھ کی زیر صدارت ہوگا، جس میں چینی کی برآمد، زرعی آمدن پر ٹیکس، گیس رائلٹی پالیسی اور دیگر اہم امور سمیت 24 نکاتی ایجنڈے پر غور کیا جائے گا۔اجلاس میں 2 لاکھ میٹرک ٹن چینی کی برآمد کے لیے وفاقی حکومت کو خطوط بھیجنے کی توثیق پر غور کیا جائے گا۔ اس کے علاوہ زرعی آمدن پر ٹیکس اور گیس رائلٹی پالیسی سے متعلق معاملات بھی زیر بحث آئیں گے۔سندھ کابینہ موٹر وہیکلز آرڈیننس میں ترامیم کی منظوری پر بھی غور کرے گی، جن کا مقصد ڈیجیٹل نظامِ حکومت، سڑکوں کی حفاظت اور ٹرانسپورٹ کے ضوابط کو مزید مؤثر بنانا ہے۔
یہ بھی پڑھیں: فیصل آباد میں صنعتکار ریحان اشرف قتل کیس، زیرِ حراست افراد کی تعداد 6 ہوگئی
اجلاس کے ایجنڈے میں کراچی واٹر اینڈ سیوریج کارپوریشن ایکٹ 2023 میں مجوزہ ترامیم اور چنیسر گوٹھ کی ڈسپنسری کو اپ گریڈ کرنے کا معاملہ بھی شامل ہے۔مزید برآں میر رضا علی کے جاں بحق ہونے کے واقعے کی تحقیقات کرنے والے کمیشن کی رپورٹ بھی سندھ کابینہ میں پیش کی جائے گی، جس کا جائزہ لیا جائے گا۔
