بیجنگ :(پاک ترک نیوز)نئے سال کےموقع پر اپنے خطاب میں چینی صدر شی جن پنگ نےکہا ہےکہ چین اور تائیوان کو ایک ہونے سے کوئی نہیں روک سکتا۔ آبنائے تائیوان کے دونوں جانب رہنے والے چینی باشندوں کا ایک دوسرے کے ساتھ خون اور رشتہ داری کا تعلق ہے۔ چین سے تائیوان کا دوبارہ الحاق ناگزیر ہے اور اسے روکا نہیں جاسکتا۔
دوسری جانب پاکستان نے آبنائے تائیوان میں حالیہ پیش رفت اور تائیوان سے متعلق سوالات پر چین کے مؤقف کی ایک بار پھر بھرپور حمایت کا اعلان کیا ہے۔
دفتر خارجہ کے ترجمان طاہر اندرابی نے میڈیا کے سوالات کا جواب دیتے ہوئے واضح کیا ہے کہ پاکستان چین کو اپنا آہنی دوست اور ہر موسم کا تذویراتی شراکت دار سمجھتا ہے۔
انہوں نے کہا کہ پاکستان چین کے بنیادی قومی مفادات سے متعلق تمام معاملات پر اپنی مستقل اور غیر متزلزل حمایت کا اعادہ کرتا ہے، جن میں تائیوان بھی شامل ہےوزارت خارجہ کے ترجمان نے واضح کیا کہ پاکستان ون چائنا پالیسی پر مکمل طور پر کاربند ہے اور تائیوان کو چین کا اٹوٹ انگ تصور کرتا ہے، پاکستان مستقبل میں بھی اس اصول کی پاسداری جاری رکھے گا۔پاکستان اور چین کے درمیان اس واضح ہم آہنگی کو خطے میں اسٹریٹجک شراکت داری کی ایک مضبوط مثال قرار دیا جا رہا ہے، جس سے یہ پیغام بھی دیا گیا ہے کہ عالمی دباؤ کے باوجود پاکستان چین کے ساتھ اپنے اصولی مؤقف پر قائم ہے۔
