اسلام آباد (پاک ترک نیوز)چیف الیکشن کمشنر اور الیکشن کمیشن کے ارکان کی تقرری کے معاملے پر اہم پیش رفت سامنے آگئی، وزیراعظم شہباز شریف نے اپوزیشن لیڈر محمود خان اچکزئی کے خط کا جواب دے دیا۔
ذرائع کے مطابق وزیراعظم نے اپنے جواب میں کہا کہ جناب اپوزیشن لیڈر، آپ کا خط موصول ہوا ہے۔ وزیراعظم نے وزیر اعظم سیکریٹریٹ کو ہدایت کردی ہے کہ وہ اپوزیشن لیڈر سے رابطے میں رہے۔
وزیراعظم شہباز شریف کی جانب سے محمود خان اچکزئی کو 24 اگست کو لکھے گئے خط کی کاپی بھی منظر عام پر آگئی ہے۔
خط میں وزیراعظم نے سابق اپوزیشن لیڈر کو مئی 2025 میں لکھے گئے خط کا حوالہ دیتے ہوئے کہا کہ انہوں نے چیف الیکشن کمشنر اور الیکشن کمیشن کے ارکان کی تقرری کے لیے مشاورت کی دعوت دی تھی، تاہم سابق قائد حزب اختلاف کی جانب سے خط کا کوئی جواب نہیں دیا گیا۔
وزیراعظم نے کہا کہ وہ جمہوری اقدار پر پختہ یقین رکھتے ہیں اور قومی معاملات پر مشاورت کے لیے کئی مرتبہ محمود اچکزئی کو ملاقات کی دعوت دے چکے ہیں۔
شہباز شریف نے اپوزیشن لیڈر کے حالیہ خط کا خیرمقدم کرتے ہوئے کہا کہ وہ چیف الیکشن کمشنر اور ارکان کی تقرری کے معاملے پر مجوزہ ملاقات کے لیے دستیاب ہیں۔
