راولپنڈی ( پاک ترک نیوز) خیبرپختونخوا میں سیکیورٹی فورسز نے دو الگ الگ انٹیلی جنس اور آپریشنل کارروائیوں کے دوران 10 دہشت گرد ہلاک کر دیئے۔
پاک فوج کے شعبۂ تعلقات عامہ (آئی ایس پی آر) کے مطابق 6 اگست کو جنوبی وزیرستان اور ضلع دیر میں دہشت گردوں کے خلاف دو کامیاب کارروائیاں کی گئیں۔
آئی ایس پی آر کے مطابق جنوبی وزیرستان کے علاقے اعظم ورسک میں دہشت گردوں نے سیکیورٹی فورسز کی چیک پوسٹوں پر حملے کی کوشش کی، تاہم فورسز نے بروقت اور مؤثر کارروائی کرتے ہوئے حملہ ناکام بنا دیا۔ شدید فائرنگ کے تبادلے میں 8 دہشت گرد ہلاک ہوگئے۔
بیان کے مطابق ضلع دیر میں ایک اور کارروائی کے دوران مزید 2 دہشت گرد مارے گئے، یوں دونوں کارروائیوں میں مجموعی طور پر 10 دہشت گرد ہلاک ہوئے۔
آئی ایس پی آر کا کہنا ہے کہ ہلاک دہشت گردوں کے قبضے سے اسلحہ اور گولہ بارود برآمد کیا گیا، جبکہ وہ علاقے میں متعدد دہشت گرد کارروائیوں میں ملوث تھے۔
یہ بھی پڑھیں: دہشت گرد ارمان بلوچ کا کالعدم تنظیم سے لاتعلقی کا اعلان
ترجمان پاک فوج کے مطابق علاقے میں دیگر دہشت گردوں کی موجودگی کے پیش نظر کلیئرنس اور سینیٹائزیشن آپریشن جاری ہے۔
آئی ایس پی آر نے کہا کہ عزمِ استحکام کے وژن کے تحت سیکیورٹی فورسز اور قانون نافذ کرنے والے ادارے دہشت گردی کے خاتمے کے لیے پوری قوت سے کارروائیاں جاری رکھے ہوئے ہیں، اور ملک سے غیر ملکی سرپرستی میں ہونے والی دہشت گردی کے مکمل خاتمے تک یہ آپریشن بلا تعطل جاری رہیں گے۔
