اسلام آباد(پاک ترک نیوز ) وفاقی حکومت نے ریٹائرمنٹ کے بعد دوبارہ سرکاری ملازمت اختیار کرنے والے افراد کے لیے پنشن اور تنخواہ سے متعلق عائد پابندیوں کے دونوں نوٹیفکیشنز واپس لے لیے۔
وفاقی وزارتِ خزانہ کی جانب سے جاری کردہ نئے آفس میمورنڈم کے مطابق ان نوٹیفکیشنز کی واپسی کا اطلاق فوری طور پر ہوگا۔
وزارتِ خزانہ نے 22 اپریل 2025 کو جاری کیا گیا وہ نوٹیفکیشن واپس لے لیا ہے جس کے تحت دوبارہ سرکاری ملازمت پر پنشن یا تنخواہ میں سے کسی ایک کے انتخاب کو لازم قرار دیا گیا تھا۔
نوٹیفکیشن کے ذریعے 60 سال کی عمر کے بعد دوبارہ ملازمت اختیار کرنے والے وفاقی پنشنرز پر بیک وقت پنشن اور تنخواہ لینے پر پابندی عائد کی گئی تھی۔
وزارتِ خزانہ نے 19 جون 2025 کو جاری کیا گیا دوسرا نوٹیفکیشن بھی واپس لے لیا ہے جس میں دوبارہ ملازمت پر پنشن کی مشروط اجازت دی گئی تھی, اس نوٹیفکیشن کے تحت تنخواہ کو گراس پنشن کی رقم کے برابر کم کرنے کی شرط عائد کی گئی تھی۔
وزارتِ خزانہ کی جانب سے جاری آفس میمورنڈم وفاقی وزارتوں اور ڈویژنز کو ارسال کر دیا گیا ہے جس میں واضح کیا گیا ہے کہ دونوں سابقہ نوٹیفکیشنز منسوخ کیے جا چکے ہیں اور اب ان پر عملدرآمد نہیں ہوگا۔
اس فیصلے کا مقصد ریٹائرڈ ملازمین کے حوالے سے ابہام کا خاتمہ اور انتظامی معاملات میں سہولت پیدا کرنا ہے۔
حکومت نے دوبارہ ملازمت پر پنشن و تنخواہ سے متعلق دونوں نوٹیفکیشنز واپس لے لیے
