اسلام آباد (پاک ترک نیوز )وزیراعظم شہباز شریف نے خیبر پختونخوا میں دہشتگردی کے خلاف کارروائیوں کے دوران شہید ہونے والے پولیس اہلکاروں کے اہلخانہ سے دلی ہمدردی اور تعزیت کا اظہار کیا ہے۔ وزیراعظم نے شہداء کے درجات کی بلندی اور سوگوار خاندانوں کے لیے صبر جمیل کی دعا بھی کی۔
وزیراعظم شہباز شریف نے دہشتگردوں کے خلاف کارروائی میں 18 خوارج کی ہلاکت کو خیبر پختونخوا پولیس کی پیشہ ورانہ صلاحیتوں، بہادری اور دہشتگردی کے خلاف غیر متزلزل عزم کا مظہر قرار دیا۔
شہباز شریف کا کہنا تھا کہ جرائم پیشہ عناصر اور فتنۃ الخوارج کا گٹھ جوڑ ملک میں بدامنی پھیلانے کی مذموم کوشش ہے، ایسے عناصر کو اپنے ناپاک عزائم میں کسی صورت کامیاب نہیں ہونے دیں گے۔
وزیراعظم نے کہا کہ خیبر پختونخوا پولیس نے دہشتگردی کے خلاف جنگ میں بے مثال قربانیاں دی ہیں، پولیس اور دیگر قانون نافذ کرنے والے اداروں کے افسران اور اہلکار جس جرأت اور ثابت قدمی سے اپنے فرائض انجام دے رہے ہیں وہ لائق تحسین ہے۔
ان کا کہنا تھا کہ دہشتگردی کے خلاف جنگ میں پوری قوم اپنی بہادر سکیورٹی فورسز اور قانون نافذ کرنے والے اداروں کے شانہ بشانہ کھڑی ہے۔
وزیراعظم نے واضح کیا کہ پاکستان کے امن و استحکام پر کوئی سمجھوتہ نہیں کیا جائے گا، ملک سے دہشتگردی کے ناسور کے مکمل خاتمے کے لیے حکومت پُرعزم ہے۔
