پاکستان خطے میں امن کے فروغ کے لیے اپنا تعمیری کردار جاری رکھے گا، وزیراعظم

اسلام آباد ( پاک ترک نیوز) وزیراعظم شہبازشریف کا کہنا ہے کہ پاکستان خطے میں امن کے فروغ کے لیے اپنا تعمیری کردار جاری رکھے گا۔
وزیراعظم شہباز شریف کا ایرانی صدرمسعود پزشکیان سے ٹیلیفونک رابطہ ہوا،شہباز شریف نے ایرانی صدر اور عوام کو عیدالفطر و نوروز کی مبارکباد پیش کی۔
ایرانی صدر مسعودپزشکیان نے مبارکباد کا پرتپاک انداز میں جواب دیا اور پاکستانی عوام کیلئے نیک تمناؤں کا اظہار کیا،وزیراعظم نے جاری کشیدگی کے تناظر میں ایران کے ساتھ پاکستان کی یکجہتی کا اظہار کیا۔
وزیراعظم شہباز شریف نے قیمتی جانوں کے ضیاع پر اظہار افسوس اور زخمیوں کی جلد صحتیابی کیلئے دعا کی،انہوں نے خلیجی خطے میں جاری کشیدہ صورتحال پر گہری تشویش کا اظہار کیا۔
وزیراعظم نے کشیدگی میں کمی، مذاکرات اور سفارتکاری کی طرف واپسی کی فوری ضرورت پر زور دیتے ہوئے کہا کہ پاکستان خطے میں امن کے فروغ کے لیے اپنا تعمیری کردار جاری رکھے گا۔