واشنگٹن (پاک ترک نیوز )عالمی منڈی میں تیل کی صورتحال تبدیل ہونے لگی، ایران جنگ کے آغاز کے بعد پہلی بار عالمی سطح پر تیل کی رسد طلب سے بڑھ گئی، اکتوبر میں یومیہ تقریباً 20 لاکھ بیرل اضافی تیل عالمی منڈی میں دستیاب رہا۔
بین الاقوامی توانائی ایجنسی کے مطابق مشرق وسطیٰ میں کشیدگی کے باعث کئی ماہ تک متاثر رہنے والی تیل کی ترسیل میں بہتری آئی ہے، خلیجی ممالک سے تیل کی برآمدات عالمی طلب کے مقابلے میں کہیں زیادہ تیزی سے بحال ہوئی ہیں۔
ایجنسی کا کہنا ہے کہ عالمی تیل منڈی میں توازن بحال ہونے کے ابتدائی آثار سامنے آ رہے ہیں۔ اس سے قبل ایران جنگ کے باعث آبنائے ہرمز کے ذریعے تیل اور گیس کی ترسیل متاثر ہوئی تھی، جہاں سے دنیا کی تقریباً پانچویں حصے کی تیل اور گیس کی سپلائی گزرتی ہے۔
رپورٹ کے مطابق جنگ کے آغاز سے قبل فروری میں عالمی معیار کے برینٹ خام تیل کی قیمت تقریباً 72 ڈالر فی بیرل تھی، جو اپریل کے اختتام تک بڑھ کر 126 ڈالر تک پہنچ گئی۔ تاہم حالیہ دنوں میں قیمتوں میں کمی ریکارڈ کی گئی اور جمعے کو برینٹ خام تیل تقریباً 95 ڈالر فی بیرل پر فروخت ہوتا رہا۔
بین الاقوامی توانائی ایجنسی نے پیش گوئی کی ہے کہ رواں سال کی آخری سہ ماہی میں عالمی سطح پر تیل کی یومیہ رسد 10 کروڑ 50 لاکھ بیرل رہنے کا امکان ہے، جو متوقع طلب سے 17 لاکھ بیرل زیادہ ہوگی۔
ایجنسی کے مطابق تیل کی رسد میں بہتری کے باعث ہنگامی ذخائر پر دباؤ بھی کم ہوا ہے۔ رکن ممالک فروری کے اختتام تک مزید 7 کروڑ 10 لاکھ بیرل تیل عالمی منڈی میں فراہم کریں گے۔
دوسری جانب تیل برآمد کرنے والے ممالک کی تنظیم اوپیک پلس کے مطابق اکتوبر میں خام تیل کی یومیہ پیداوار 4 کروڑ 10 لاکھ بیرل رہی، جو ستمبر کے مقابلے میں زیادہ ہے۔
عالمی توانائی ایجنسی کا کہنا ہے کہ رواں سال تیل کی عالمی طلب میں یومیہ 26 لاکھ 80 ہزار بیرل کمی متوقع ہے اور یہ 10 کروڑ 32 لاکھ بیرل یومیہ رہ سکتی ہے۔ آئندہ سال طلب میں بحالی کا امکان ہے، تاہم بلند قیمتوں، برقی گاڑیوں کے بڑھتے استعمال اور ایندھن کی بچت کے رجحان کے باعث گاڑیوں کے ایندھن کی کھپت متاثر رہے گی۔












