اسلام آباد (پاک ترک نیوز )حکومت نے ملک بھر میں دی جانے والی فیول سبسڈی ختم کرنے کا فیصلہ کرلیا۔نائب وزیراعظم سینیٹر اسحاق ڈار کی زیر صدارت فیول سبسڈی سے متعلق قومی اسٹیئرنگ کمیٹی کا اجلاس ہوا ۔
اعلامیے کے مطابق اجلاس میں موٹر سائیکل سواروں اور چھوٹے کسانوں کو دی جانے والی فیول سبسڈی ختم کرنے کا فیصلہ کیا گیا۔
اعلامیے کے مطابق حکومت نے عوامی ٹرانسپورٹ اور مال بردار ٹرانسپورٹ کی دی جانے والی فیول سبسڈی بھی ختم کرنے کا فیصلہ کیا ہے۔ ختم کی گئی فیول سبسڈی چاروں صوبوں، گلگت بلتستان اور آزاد کشمیر میں دی جارہی تھی۔
اعلامیے کے مطابق عالمی سطح پر ایندھن کی قیمتوں میں نمایاں کمی آئی ہے، جس کا فائدہ پہلے ہی صارفین کو منتقل کیا جا چکا ہے۔ قومی اسٹیئرنگ کمیٹی نے وزیراعظم شہباز شریف کی منظوری سےفیول سبسڈی ختم کرنے پر اتفاق کیا ہے۔
اجلاس میں بتایا گیا کہ فیول سبسڈی کے تحت موٹر سائیکل، رکشہ اور 800 سی سی گاڑیوں کو 50 سے 100 روپے فی لیٹر سبسڈی ملتی تھی۔
بتایا گیا کہ پبلک اور اور گڈز ٹرانسپورٹ والوں کو 70 ہزار سے 1 لاکھ روپے ماہانہ سبسڈی ملتی تھی تاکہ کرائے کم رکھے جا سکیں جبکہ چھوٹے کاشتکاروں کو ڈیزل پر 100 روپے فی لیٹر سبسڈی ملتی تھی۔
