ووٹرز کل اپنا حقِ رائے دہی استعمال کرتے ہوئے آئندہ پانچ برس کے لیے اپنے نمائندوں کا انتخاب کریں گے
گلگت ( پاک ترک نیوز) گلگت بلتستان اسمبلی کے انتخابات کے لیے انتخابی مہم اپنے اختتام کو پہنچ گئی، جبکہ ووٹرز کل اپنا حقِ رائے دہی استعمال کرتے ہوئے آئندہ پانچ برس کے لیے اپنے نمائندوں کا انتخاب کریں گے۔
تفصیلات کےمطابق گلگت بلتستان میں انتخابی مہم ختم ہو گئی ، پولنگ کل ہو گی۔
انتخابی مہم کے آخری روز مختلف سیاسی جماعتوں کے قائدین اور امیدواروں نے بھرپور انتخابی سرگرمیاں جاری رکھیں۔ جلسوں، کارنر میٹنگز اور عوامی رابطہ مہم کے ذریعے ووٹرز کو اپنے حق میں قائل کرنے کی کوششیں کی گئیں۔
الیکشن کمیشن کے مطابق گلگت بلتستان میں مجموعی طور پر 9 لاکھ 58 ہزار 480 رجسٹرڈ ووٹرز حقِ رائے دہی استعمال کریں گے، جو 24 انتخابی نشستوں پر امیدواروں کی قسمت کا فیصلہ کریں گے۔
انتخابات میں مجموعی طور پر 396 امیدوار میدان میں ہیں، جن میں 266 آزاد امیدوار بھی شامل ہیں۔ خواتین کی نمائندگی بھی دیکھنے میں آ رہی ہے اور آٹھ خواتین امیدوار انتخابات میں حصہ لے رہی ہیں، جن میں پانچ آزاد حیثیت سے میدان میں موجود ہیں۔
پیپلز پارٹی کے 23،مسلم لیگ ن کے 22، استحکام پاکستان پارٹی کے 15، پاکستان مسلم لیگ کے گیارہ ، اسلامک تحریک کے دس امیدوار قسمت آزمائی کریں گے
انتخابی مہم ختم ہونے کے بعد اب تمام نظریں پولنگ ڈے پر مرکوز ہیں، جہاں ووٹرز اپنے ووٹ کے ذریعے گلگت بلتستان کی آئندہ سیاسی سمت کا تعین کریں گے۔
یہ بھی پڑھیں: خیبر پختونخوا، کشمیر، گلگت میں بارشوں نےتباہی مچادی، 330 سے زائد افراد جاں بحق
