کراچی ( پاک ترک نیوز) بانی پاکستان قائد اعظم محمد علی جناح کا 149 واں یوم پیدائش آج ملک بھر میں عقیدت واحترام سے منایا جا رہا ہے۔قائداعظم کے یوم پیدائش کی مناسبت سے ملک بھر میں سیمینارز، کانفرنسز اور دیگر تقریبات کا انعقاد کیا جا رہا ہے۔
بابائے قوم قائد اعظم کے یوم ولادت کے موقع پر کراچی سمیت ملک بھر میں خصوصی تقریبات کا انعقاد کیا جا رہا ہے، بانی پاکستان کے یوم پیدائش پر گارڈز کی تبدیلی کی تقریب مزار قائد پر منعقد ہوئی۔
پاک فوج کے چاق و چوبند دستے نے مزار قائد پر سلامی دی، مزار قائد پر فاتحہ خوانی کی گئی، پاکستان ملٹری اکیڈمی کاکول کےچاق وچوبند دستے نے مزار قائد پر فرائض سنبھال لیے، میجر جنرل افتخار حسن چودھری ہلال امتیاز ملٹری تقریب کے مہمان خصوصی تھے۔
تقریبات میں قائد اعظم محمد جناح کو ان کی برصغیر کے مسلمانوں کے لیے آزاد اور خود مختار پاکستان کے خواب کو شرمندہ تعبیر کرنے کے لیے کی گئی جدوجہد پر شاندار الفاظ میں خراج عقیدت پیش کیا جائے گا۔
قائداعظم نے اپنی قائدانہ صلاحیتوں سے ایک آزاد ریاست کا خواب حقیقت میں بدلا، ایمان، اتحاد، اور تنظیم پر مبنی اصول قائد کی زندگی کا نچوڑ ہیں۔
بانی پاکستان قائداعظم کا 149 واں یوم پیدائش، مزار قائد پر گارڈز کی تبدیلی کی پروقار تقریب
