اسلام آباد ( پاک ترک نیوز) یوم الحاق پاکستان کے موقع پر صدر مملکت آصف زرداری اور وزیراعظم شہباز شریف نے خصوصی پیغام جاری کئے ہیں۔
صدر مملکت آصف زرداری کا اپنے پیغام میں کہنا تھا کہ بھارتی فوج کی سفاکیت کشمیریوں کے عزم کو توڑنے میں ناکام رہی۔
صدر زرداری نے کہا کہ 19 جولائی 1947 کو کشمیریوں نے پاکستان کے ساتھ الحاق کی قرارداد منظور کی، یومِ الحاق کشمیریوں کی پاکستان سے فطری رشتے کی علامت ہے۔
صدر مملکت نے کہا کہ کشمیریوں کی قربانیاں آج دنیا بھر میں قربانی کی مثال بن چکی ہیں،حق خودارادیت ملنے تک کشمیریوں کی اخلاقی، سیاسی اور سفارتی حمایت جاری رہے گی، انہوں نے کہا کہ کشمیری عوام کی جدوجہد رائیگاں نہیں جائے گی۔
یوم الحاق پاکستان پر وزیراعظم شہباز شریف نے اپنے پیغام میں کہا ہے کہ 19 جولائی1947 کو کشمیری عوام نے پاکستان سے الحاق کی قرارداد منظور کی، ان کا کہنا تھا کہ بھارت کے 10 لاکھ فوجی بھی کشمیریوں کے جذبہ آزادی کو نہ دباسکے۔
انہوں نے اپنے پیغام میں کہا کہ کشمیریوں کی تیسری نسل بھی حق خودارادیت کے لیے پرعزم ہے، دہائیوں پر محیط جدوجہد کشمیریوں کے جذبہ حریت کا ثبوت ہے، مسئلہ کشمیر کا پُرامن حل ہی خطے کے امن کی ضمانت ہے۔
یاد رہے کہ 19 جولائی 1947 کشمیریوں کا پاکستان سے یوم الحاق کا دن، کشمیری اسی عہد کی تجدید کرتے ہوئے آج یوم الحاق پاکستان منا رہے ہیں۔
یوم الحاق پاکستان کے موقع پر صدر و وزیراعظم کا خصوصی پیغام
