سڈنی :(پاک ترک نیوز) سڈنی ٹیسٹ میںانگلینڈ کے سینئر بیٹر جو روٹ نے ایشز سیریز کے پانچویں اور آخری ٹیسٹ میں آسٹریلیا کے خلاف شاندار سنچری اسکور کر کے ایک اور تاریخی سنگِ میل عبور کر لیا۔
انٹرنیشنل کرکٹ کونسل (آئی سی سی) کے مطابق جو روٹ ٹیسٹ کرکٹ میں سب سے زیادہ سنچریاں بنانے والے کھلاڑیوں کی فہرست میں مشترکہ طور پر تیسرے نمبر پر پہنچ گئے ہیں۔
دائیں ہاتھ کے بلے باز جو روٹ نے اپنی 41ویں ٹیسٹ سنچری اسکور کر کے آسٹریلوی لیجنڈ رکی پونٹنگ کا ریکارڈ برابر کر دیا۔ رکی پونٹنگ نے 168 ٹیسٹ میچز میں 13 ہزار 378 رنز بنائے تھے، جن میں 41 سنچریاں اور 62 نصف سنچریاں شامل ہیں، جبکہ ان کا اوسط 51.85 رہا۔جو روٹ نے سڈنی ٹیسٹ کی پہلی اننگز میں 146 گیندوں پر اپنی 41ویں سنچری مکمل کی۔
یہ موجودہ ایشز سیریز میں ان کی دوسری سنچری ہے۔ اس سے قبل انہوں نے برسبین میں کھیلے گئے پنک بال ٹیسٹ میں بھی سنچری اسکور کی تھی۔ 2021 کے بعد یہ جو روٹ کی 24ویں ٹیسٹ سنچری ہے، جو اس عرصے میں کسی بھی کھلاڑی سے زیادہ ہے۔
ٹیسٹ کرکٹ میں سب سے زیادہ سنچریوں کی فہرست میں اب جو روٹ صرف جنوبی افریقہ کے عظیم بلے باز جیکس کیلس (45 سنچریاں) اور بھارتی لیجنڈ سچن ٹنڈولکر (51 سنچریاں) سے پیچھے ہیں۔
جو روٹ اب تک 162 ٹیسٹ میچز کی 296 اننگز میں 13 ہزار 777 رنز بنا چکے ہیں اور ان کا اوسط 50.83 ہے، جبکہ وہ 14 ہزار ٹیسٹ رنز کے سنگِ میل کے بھی قریب پہنچ چکے ہیں۔
