ماسکو ( پاک ترک نیوز) روس نے ایلون مسک کی کمپنی اسپیس ایکس کے اسٹارلنک کا متبادل تیار کرنے کے لیے خلائی منصوبے میں تیزی لانے کا فیصلہ کر لیا۔ یوکرین کی ملٹری انٹیلی جنس کے مطابق روس رواں سال مزید تقریباً 20 سیٹلائٹس جبکہ 2027 میں 240 نئے سیٹلائٹس خلا میں بھیجنے کی تیاری کر رہا ہے۔بزنس انسائیڈر کی رپورٹ کے مطابق روس کا یہ منصوبہ ’’راسویٹ‘‘ کہلاتا ہے، جس کے تحت زمین کے نچلے مدار میں سیٹلائٹس کا نیٹ ورک قائم کیا جا رہا ہے۔
روس رواں سال اب تک اس منصوبے کے تحت 30 سیٹلائٹس خلا میں بھیج چکا ہے۔یوکرینی انٹیلی جنس کے مطابق ان میں سے دو سیٹلائٹس پہلے ہی مدار سے باہر ہو چکے ہیں جبکہ 26 سیٹلائٹس تقریباً 320 میل کی بلندی پر مستحکم پوزیشن حاصل کر چکے ہیں۔ تاہم کوئی بھی سیٹلائٹ ابھی تک مقررہ 500 میل کی بلندی تک نہیں پہنچ سکا۔رپورٹ کے مطابق روس کا ہدف رواں سال کے اختتام تک سیٹلائٹس کی تعداد 48 تک پہنچانا اور 2027 میں مزید 240 سیٹلائٹس بھیجنا ہے۔ اس نیٹ ورک کے ذریعے روسی علاقے کے 94 فیصد حصے کو انٹرنیٹ فراہم کرنے اور 150 میگا بٹس فی سیکنڈ تک رفتار حاصل کرنے کا منصوبہ ہے۔
یہ بھی پڑھیں: شین ڈائٹز پاکستان ویمنز کرکٹ ٹیم کے ہیڈ کوچ مقرر
ماسکو 2031 تک راسویٹ نیٹ ورک میں سیٹلائٹس کی تعداد 408 جبکہ 2035 تک 924 تک بڑھانا چاہتا ہے۔ ہر سیٹلائٹ کا وزن 600 پاؤنڈ سے کچھ زیادہ ہے اور ڈیٹا کی ترسیل کے لیے زمینی اسٹیشنوں کے بجائے لیزر کمیونیکیشن ٹیکنالوجی استعمال کی جائے گی۔یوکرینی انٹیلی جنس کے مطابق روسی منصوبے کو راکٹ لانچنگ میں مشکلات اور غیر ملکی پرزوں پر انحصار جیسے چیلنجز کا سامنا ہے۔ روس سیٹلائٹس کو مدار میں بھیجنے کے لیے سویوز ٹو پوائنٹ ون بی راکٹ استعمال کر رہا ہے۔دوسری جانب یوکرین کو اسٹارلنک اور اسٹار شیلڈ سروسز میں رکاوٹوں کا سامنا ہے، جنہیں یوکرینی فوج ڈرون آپریشنز اور میدان جنگ میں رابطوں کے لیے استعمال کرتی ہے۔
یوکرینی صدر زیلنسکی کے مطابق حالیہ رفتار کی پابندیوں نے روسی ڈرونز کو روکنے کی کارروائیوں کو بھی متاثر کیا ہے۔یوکرین کی وزارت دفاع انٹرنیٹ سروس بحال رکھنے کے لیے اسپیس ایکس سے رابطے میں ہے جبکہ روسی سیٹلائٹ نیٹ ورک کی توسیع سے خطے میں خلائی ٹیکنالوجی اور فوجی مواصلاتی نظام کی اہمیت مزید بڑھنے کا امکان ہے۔












