انقرہ ( پاک ترک نیوز) ترکیہ میں لوہے اور اسٹیل بنانے والی فیکٹری میں خوفناک دھماکے سے 17 افراد ہلاک 14زخمی ہو گئے۔ تین کی حالت تشویشناک بتائی جا رہی ہے۔ دھماکے کے بعد فیکٹری میں آگ بھڑک اٹھی اور علاقے میں خوف و ہراس پھیل گیا۔غیر ملکی میڈیا رپورٹس کے مطابق حادثہ ترکیہ کے شہر ازمیر میں واقع اسٹیل فیکٹری میں پیش آیا، جہاں پگھلے ہوئے اسٹیل کو سانچوں میں ڈالنے کا کام جاری تھا۔ اسی دوران بھاری سامان اٹھانے والی کرین ٹوٹ کر نیچے موجود بھٹی میں جا گری، جس کے نتیجے میں زوردار دھماکا ہوا اور فیکٹری میں آگ لگ گئی۔
دھماکے کے بعد فیکٹری سے بلند ہوتے شعلوں اور دھوئیں کے سیاہ بادلوں نے پورے علاقے کو اپنی لپیٹ میں لے لیا۔ عینی شاہدین کے مطابق دھماکا اتنا شدید تھا کہ زمین لرز اٹھی اور ابتدا میں لوگوں کو زلزلے کا گمان ہوا۔ترکیہ کے وزیر صحت کمال میمیش اوغلو کے مطابق شدید زخمی ہونے والا ایک شخص دوران علاج دم توڑ گیا، جس کے بعد ہلاکتوں کی تعداد 17 ہوگئی۔ حادثے میں 14 افراد زخمی ہوئے، جن میں سے تین کی حالت نازک ہے۔ازمیر کے گورنر سلیمان البان نے خدشہ ظاہر کیا ہے کہ بعض افراد اب بھی ملبے تلے دبے ہوسکتے ہیں، جن کی تلاش کے لیے امدادی کارروائیاں جاری ہیں۔
یہ بھی پڑھیں: ٹرمپ کاایران جنگ سے امریکا کو نقصان پہنچنے کا اعتراف، جنگ مزید نہ بڑھانے کا بھی اشارہ
ترکیہ کے صدر رجب طیب اردوان نے حادثے میں قیمتی انسانی جانوں کے ضیاع پر افسوس کا اظہار کرتے ہوئے تحقیقات کی ہدایت کر دی ہے۔ مقامی میڈیا رپورٹس کے مطابق واقعے کے سلسلے میں کم از کم پانچ افراد کو گرفتار بھی کیا گیا ہے۔دوسری جانب فیکٹری انتظامیہ کا کہنا ہے کہ حادثہ پلانٹ کی الیکٹرک آرک فرنس کی طے شدہ مرمت کے دوران پیش آیا۔
