استنبول (پاک ترک نیوز )ترکیہ میں کوئلے کی کان کنی سے متاثرہ دیہاتیوں نے عالمی رہنماؤں اور اقوام متحدہ کے حکام سے مطالبہ کیا ہے کہ وہ موسمیاتی تبدیلی سے متعلق عالمی کانفرنس کے دوران اجلاسوں سے باہر نکل کر متاثرہ علاقوں کا دورہ کریں اور اپنی آنکھوں سے ماحولیاتی تباہی کا مشاہدہ کریں۔
مقامی منتخب عہدیدار نجلا ایشک نے عالمی رہنماؤں سے اپیل کی ہے کہ وہ انطالیہ کے کانفرنس ہالوں تک محدود رہنے کے بجائے متاثرہ گاؤں کا دورہ کریں۔ ان کے مطابق ان کا گھر کوئلے کی کان سے چند سو میٹر کے فاصلے پر واقع ہے اور کئی دہائیوں سے کان کنی کا دائرہ مسلسل پھیل رہا ہے۔
مظاہروں میں حصہ لینے والے دیہاتیوں کو گرفتاریوں اور جرمانوں کا سامنا بھی کرنا پڑا ہے۔ نجلا ایشک کی چھبیس سالہ بیٹی اسرا کو کان کنی کے لیے زمین حاصل کرنے کے منصوبے کے خلاف احتجاج پر بیالیس روز تک حراست میں رکھا گیا۔ رواں سال جولائی میں عدالت نے سرکاری اہلکاروں کی مزاحمت کے الزام میں انہیں دو سال قید کی سزا سنائی، تاہم اپیل کے فیصلے تک وہ آزاد ہیں۔
ترکیہ گزشتہ سال اپنی بجلی کی چونتیس فیصد ضروریات کوئلے سے پوری کر رہا تھا اور یوں یورپ میں کوئلے سے بجلی پیدا کرنے والا سب سے بڑا ملک بن گیا تھا۔ ماحولیاتی کارکنوں کا کہنا ہے کہ کوئلے کے استعمال میں کمی کے بغیر صاف توانائی کی جانب منتقلی کا ہدف حاصل کرنا مشکل ہوگا۔
دوسری جانب ترکیہ کے وزیر توانائی الپ ارسلان بایراکتار کا کہنا ہے کہ صاف توانائی کی جانب منصفانہ منتقلی کے لیے کوششیں جاری ہیں، تاہم کانوں سے ہزاروں افراد کا روزگار وابستہ ہونے کے باعث یہ عمل آسان نہیں۔ ان کے مطابق حکومت دو ہزار چالیس تک جوہری توانائی سے دس گیگاواٹ بجلی پیدا کرنے کی صلاحیت حاصل کرنے کا ہدف رکھتی ہے۔
انسانی حقوق کی تنظیموں نے ترکی میں ماحولیاتی کارکنوں کے خلاف کارروائیوں اور احتجاج پر پابندیوں پر بھی تشویش ظاہر کی ہے۔ ترک حکومت کا مؤقف ہے کہ پولیس غیر قانونی مظاہروں یا امن و امان کو خطرے میں ڈالنے والی سرگرمیوں کے خلاف کارروائی کرتی ہے۔
یہ بھی پڑھیں: ہیری پوٹر کے مداحوں کے لیے خوشخبری، جے کے رولنگ کی دو نئی کتابیں 2027 میں شائع ہوں گی
ماحولیاتی کارکنوں کا مطالبہ ہے کہ موسمیاتی تبدیلی کے خلاف عالمی وعدوں کے ساتھ ساتھ مقامی آبادیوں کے تحفظ اور کوئلے پر انحصار کم کرنے کے لیے عملی اقدامات بھی کیے جائیں۔
