راولپنڈٰی (پاک ترک نیوز)راولپنڈی کے سٹی پولیس آفیسر حسن مشتاق سکھیرا نے شہریوں کی شکایات کے فوری ازالے اور پولیس کی کارکردگی بہتر بنانے کے لیے ضلع بھر کے تمام سب ڈویژنل پولیس افسران (ایس ڈی پی اوز) کو سخت ہدایات جاری کردی ہیں۔
نئے احکامات کے تحت تمام ایس ڈی پی اوز روزانہ شام 4 سے 6 بجے تک اپنے متعلقہ سرکل کے ایک نامزد پولیس اسٹیشن میں موجود رہیں گے اور شہریوں کی شکایات براہِ راست سن کر ان کے فوری حل کو یقینی بنائیں گے۔
سی پی او نے افسران کو تھانوں میں زیرِ تفتیش مقدمات کی ذاتی طور پر نگرانی کرنے کی بھی ہدایت کی ہے تاکہ تفتیش کا عمل شفاف اور مؤثر بنایا جاسکے۔
پولیس ترجمان کے مطابق شہریوں کے مسائل کا بروقت حل اولین ترجیح ہے۔ نئے اقدامات سے عوام کا پولیس پر اعتماد بڑھانے اور پولیس کی کارکردگی بہتر بنانے میں مدد ملے گی۔
قانون کے تحت تفتیشی افسران کو مقدمات کی تحقیقات دو ہفتوں میں مکمل کرنا ہوتی ہیں، تاہم پولیس حکام ماضی میں تھانوں میں عملے پر کام کے زیادہ بوجھ اور افرادی قوت کی کمی کے باعث اس مدت میں اضافے کی ضرورت پر بھی زور دیتے رہے ہیں۔
پولیس افسران کے مطابق ایس ڈی پی اوز کا نگرانی کا کردار مؤثر بنانے اور روزانہ مخصوص اوقات میں تھانوں میں موجود رہنے سے شہریوں کو شکایات کے حل کے لیے اعلیٰ افسران تک رسائی میں آسانی ہوگی اور فیصلوں میں تاخیر بھی کم ہوسکے گی۔
ایس ایس پی آپریشنز ملک طارق محمود کی زیر صدارت سیکیورٹی اجلاس میں شہر کے اہم ٹرانزٹ پوائنٹس اور داخلی و خارجی راستوں پر سیکیورٹی بہتر بنانے کے لیے اہم فیصلے کیے گئے۔
اجلاس میں ریجنل ٹرانسپورٹ اتھارٹی کے سیکریٹری سمیت مختلف انتظامی اور سیکیورٹی اداروں کے نمائندوں نے شرکت کی۔
اجلاس میں جنرل بس اسٹینڈ کے اندر مستقل پولیس چوکی قائم کرنے اور تمام ٹرانسپورٹ اڈوں کو ای ٹکٹنگ نظام پر منتقل کرنے کا فیصلہ کیا گیا۔ آنے اور جانے والی بسوں اور ویگنوں کے مسافروں کا ڈیٹا ’ٹریول آئی‘ موبائل ایپلی کیشن کے ذریعے ریکارڈ کیا جائے گا۔
یہ بھی پڑھیں: چین کا لیزر ہتھیار، ڈرونز کے لیے نیا خطرہ
بس اور ویگن ٹرمینلز سمیت راولپنڈی ریلوے اسٹیشن پر پولیس کی خصوصی نگرانی ہوگی، جبکہ دیگر قانون نافذ کرنے والے اداروں کے تعاون سے مشترکہ چیک پوسٹس پر چیکنگ مزید سخت کی جائے گی۔شہر کے تمام داخلی اور خارجی راستوں پر خصوصی پکٹس بھی قائم کی جائیں گی۔
