پشاور ( پاک ترک نیوز) پشاور کی انسداد دہشت گردی عدالت نے 9 مئی کو ریڈیو پاکستان پر حملے کے مقدمے میں نامزد ملزمان کی عبوری ضمانت میں توسیع کر دی۔کیس کی سماعت انسداد دہشت گردی عدالت کے جج ولی محمد خان نے کی، جس کے دوران کامران بنگش، تیمور سلیم جھگڑا اور عرفان سمیت دیگر ملزمان عدالت میں پیش ہوئے۔دوران سماعت تفتیشی افسر نے عدالت کو بتایا کہ تمام ملزمان کے ضمنی چالان جمع کرا دیے گئے ہیں۔اس موقع پر جج نے استفسار کیا کہ 9 مئی کے مقدمے میں نامزد عامر چمکنی کا ضمنی چالان کہاں ہے؟ جس پر درخواست گزار کے وکیل نے بتایا کہ عامر چمکنی گزشتہ شب گرفتار ہو چکے ہیں۔
وکیل درخواست گزار نے عدالت کو بتایا کہ سہیل آفریدی کا ایک مقدمہ ہائیکورٹ میں بھی زیر سماعت ہے، جبکہ 9 مئی کے تمام مقدمات کی تفصیلات حاصل کرنے کے لیے درخواست دائر کی گئی ہے۔ موجودہ مقدمہ اس درخواست میں ظاہر نہیں کیا گیا تھا۔وکیل نے مؤقف اختیار کیا کہ انہیں کیس کی تفصیلات پڑھنے کے لیے مہلت دی جائے۔ انہوں نے سہیل آفریدی کی عدم دستیابی اور ملزمان کی بیک وقت تین مختلف تھانوں کی حدود میں موجودگی کے معاملے پر بھی سوالات اٹھائے۔
یہ بھی پڑھیں: سویڈن کا جنگی طیارے کا مصنوعی ذہانت سے کنٹرول
جج نے استفسار کیا کہ کیا وکلا اس مقدمے میں دلائل دینا چاہتے ہیں؟ جس پر وکیل درخواست گزار نے فی الحال دلائل دینے سے معذرت کر لی۔
