اسلام آباد (پاک ترک نیوز) پاکستان تحریک انصاف کی سیاسی کمیٹی نے 4 اکتوبر کے لانگ مارچ کے فیصلے کی منظوری دے دی ۔
چیئرمین پی ٹی آئی بیرسٹر گوہر کی زیرصدارت اجلاس میں لانگ مارچ سمیت خیبر پختونخوا حکومت سے متعلق ممکنہ وفاقی اقدامات پر غور کیا گیا۔ ذرائع کے مطابق اجلاس میں فیصلہ کیا گیا کہ خیبر پختونخوا حکومت کے خلاف کسی بھی وفاقی اقدام کا سیاسی اور عوامی سطح پر جواب دیا جائے گا۔ذرائع کا کہنا ہے کہ وزیراعلیٰ خیبر پختونخوا سہیل آفریدی 4 اکتوبر کے لانگ مارچ کی قیادت کریں گے۔
وزیراعلیٰ نے بھی مارچ کو آگے بڑھانے کے عزم کا اظہار کیا ہے، جبکہ پارٹی کی جانب سے مارچ کو پُرامن رکھنے پر بھی زور دیا گیا ہے۔
ذرائع کے مطابق اجلاس میں ایمرجنسی یا گورنر راج کے نفاذ کی صورت میں گورنر ہاؤس کے باہر دھرنا دینے کی تجویز پر بھی غور کیا گیا۔پی ٹی آئی چیئرمین بیرسٹر گوہر پہلے ہی کہہ چکے ہیں کہ خیبر پختونخوا میں گورنر راج یا ایمرجنسی کے کسی اقدام کی صورت میں پارٹی مزاحمت کرے گی، جبکہ ان کا کہنا ہے کہ 4 اکتوبر کا مارچ پُرامن اور سیاسی ہوگا۔
یہ بھی پڑھیں: معیشت کو پائیدار ترقی کی جانب لے جانا ہوگا، وزیر خزانہ
ذرائع کے مطابق ممکنہ وفاقی اقدام کے خلاف قانونی چارہ جوئی کے لیے قانونی ٹیم تشکیل دینے کی بھی منظوری دی گئی ہے۔واضح رہے کہ پی ٹی آئی نے اپنا لانگ مارچ پہلے 27 ستمبر سے مؤخر کرکے 4 اکتوبر کو کرنے کا اعلان کیا تھا۔ یہ فیصلہ پارٹی کی سیاسی کمیٹی کے اجلاس میں کیا گیا تھا۔
