بیجنگ (پاک ترک نیوز )چین کی معروف سیمی کنڈکٹر آلات بنانے والی کمپنی Nauraٹیکنالوجی گروپ نے چِپ سازی کے شعبے میں اہم پیش رفت کا دعویٰ کیا ہے، جس کے نتیجے میں چین کے لیے جدید تھری ڈی ڈی ریم چپس تیار کرنے کی راہ ہموار ہوسکتی ہے۔
Naura ٹیکنالوجی نے دعویٰ کیا ہے کہ اس نے تھری ڈی ڈی ریم کی تیاری کے لیے دو مرحلوں پر مشتمل ایچنگ کا نیا طریقہ تیار کرلیا ہے۔تھری ڈی ڈی ریم کو میموری ٹیکنالوجی کی اگلی نسل قرار دیا جارہا ہے، جس کا مقصد موجودہ میموری چپس میں سیل کی کثافت سے متعلق رکاوٹوں پر قابو پانا ہے۔
آئی ای ای ای جریدے میں شائع ہونے والی تحقیق کے مطابق کمپنی نے تھری ڈی ڈی ریم کے 64 تہوں میں یکساں ایچنگ حاصل کرنے کا طریقہ پیش کیا ہے۔یہ پیش رفت اس لیے بھی اہم سمجھی جارہی ہے کیونکہ چین کو جدید ای یو وی لیتھوگرافی مشینوں کے حصول پر مغربی پابندیوں کا سامنا ہے۔
ای یو وی ٹیکنالوجی کے ذریعے چپس پر انتہائی باریک سرکٹ پیٹرنز بنائے جاتے ہیں، لیکن پابندیوں کے باعث چینی کمپنیاں چپ سازی میں عمودی یا تھری ڈی ڈیزائن کی طرف زیادہ توجہ دے رہی ہیں۔
کمپنی کے مطابق اس نئے عمل میں سلیکان اور سلیکان جرمینیم کی تہیں ایک دوسرے کے اوپر رکھی جاتی ہیں۔ اس کے بعد سلیکان جرمینیم کی تہوں کو مخصوص طریقے سے ہٹا کر اندرونی سرکٹس اور دیگر حصوں کے لیے جگہ بنائی جاتی ہے۔
روایتی ایچنگ کے عمل میں کیمیکل قریبی سلیکان تہوں کو بھی نقصان پہنچا سکتے ہیں، جبکہ چپ کے نچلے حصے تک کیمیکل کی یکساں رسائی بھی ایک بڑا مسئلہ ہے۔
کمپنی کے مطابق اس طریقے سے سلیکان کے مقابلے میں سلیکان جرمینیم کی 500 سے ایک سے زیادہ ایچنگ سلیکٹیوٹی حاصل کی گئی ہے۔
