اسلام آباد ( پاک ترک نیوز) وزیراعظم کے مشیر رانا ثناء اللہ نے باغ میں انتخابی جلسے سے خطاب کرتے ہوئے پیپلز پارٹی کے چیئرمین بلاول بھٹو زرداری کو جواب دے دیا ،رانا ثناء اللہ نے کہا الٹی گنتی گننے والے خود بھی سیدھے ہو جائیں گے، ان کی گنتی بھی سیدھی ہو جائے گی۔
وزیراعظم کے مشیر رانا ثناء اللہ نےدعویٰ کیا کہ آزاد کشمیر میں مسلم لیگ ن دو تہائی اکثریت سے حکومت بنائے گی۔دو روز بعد باغ سے مزید شیر کامیاب ہو کر اسمبلی پہنچیں گے، کشمیری عوام نے میاں نواز شریف پر اعتماد کا اظہار کیا ہے۔
انہوں نے کہا مسلم لیگ ن پنجاب کے عوامی خدمت کے ماڈل کو آزاد کشمیر میں آگے بڑھائے گی، نواز شریف نے جو وعدے کیے وہ پورے کیے جائیں گے۔رانا ثناء اللہ نے کہا کشمیر پاکستان کی شہ رگ ہے، پاکستان اور کشمیر کا رشتہ لازوال ہے۔
ان کا کہنا تھا کہ بھارت پاکستانیوں اور کشمیریوں کے درمیان غلط فہمیاں پیدا کرنے کی سازش کر رہا ہے، بھارتی عزائم کبھی کامیاب نہیں ہوں گے۔
دوسری جانب وفاقی وزیر امیر مقام نے بھی آزاد کشمیر میں انتخابی جلسے سے خطاب کرتے ہوئے پیپلز پارٹی کو تنقید کا نشانہ بنایا۔امیر مقام نے کہا آزاد کشمیر میں ن لیگ کی حکومت بن چکی ہے، پیپلز پارٹی کو سوچنا چاہیے کہ عوام نے انہیں کیوں مسترد کیا۔
یہ بھی پڑھیں: آزاد کشمیر انتخابات ، تیسرے مرحلے کی انتخابی مہم کا آج آخری روز
انہوں نے کہا صدر آپ کا، وزیراعظم آپ کا، پھر دھاندلی کیسے ہوئی؟ یہ رونے دھونے کا وقت نہیں۔وفاقی وزیر نے پیپلز پارٹی سے سوال کیا کہ اپنے ماضی، حال اور مستقبل کا پلان بتائیں، عوام آپ کو حکومت کیوں دیں؟
امیر مقام کا کہنا تھا کہ کشمیری عوام نے پیپلز پارٹی کے ایجنڈے پر عمل نہیں کیا، اپنے عوام کو تکلیف میں ڈالنے سے کچھ حاصل نہیں ہوگا۔انہوں نے کہا کسی کا حق چھیننا نہیں چاہتے اور کسی کو حق چھیننے بھی نہیں دیں گے۔
