ایشیا کپ : پاکستان اور یو اے کے کل ہونیوالے میچ پر سوالیہ نشا ن برقرار

دبئی (پاک ترک نیوز) پاکستان اور یو اے ای کے درمیان کل ہونیوالے میچ پر سوالیہ نشان برقرارہے ۔
تفصیلات کے مطابق پاکستان نے ایشیا کپ 2025کےاہم مقابلے میں کل متحدہ عرب امارات کے مد مقابل آنا تھا ۔ پاکستانی وقت کے مطابق یہ میچ شام ساڑھے سات بجے شروع ہو گا۔
دونوں ٹیموں کیلئے یہ میچ فائنل کی صورت اختیار کر گیا ہے ۔ دونوں ٹیمیں پوائنٹس ٹیبل پر دو ،دو پوائنٹس کے ساتھ برابر ہیں ۔ دونوں ٹیموں نے اپنے پہلے پہلے میچ میں عمان کو شکست سے دوچار کیا تھا اور دونوں ہی ٹیموں کوبھارت کے ہاتھوں شکست کا سامنا کرنا پڑا تھا ۔میچ میں کامیابی حاصل کرنے والی ٹیم اگلے رائونڈ سپر فور میں پہنچ جائے گی جبکہ بھارت پہلے یہ دونوں میچز جیت کر سپر فور کیلئے کوالیفائی کر چکا ہے ۔
تاہم پاکستان کرکٹ بورڈ نے پاکستان کرکٹ بورڈ (پی سی بی) کے مطالبے پر میچ ریفری کو تبدیل نہ کیے جانے کی صورت میں پاکستان نے ایشیا کپ کے مزید کسی میچ میں حصہ نہ لینے کا فیصلہ کیا تھا ۔پاکستان کرکٹ بورڈ نے اسپرٹ آف دی کرکٹ کی پاسداری نہ کرنے پر آئی سی سی اور ایم سی سی کو خط لکھ کر میچ ریفری پائی کرافٹ اور ایونٹ ڈائریکٹر اینڈریو پارسل کو ہٹانےکا مطالبہ کیا ہے۔
پی سی بی کے مطالبہ تھا کہ اگر آئی سی سی نے میچ ریفری کو تبدیل نہ کیا تو پاکستان ٹیم ایشیا کپ کے مزید کسی میچ میں حصہ نہیں لے گی۔
دوسری جانب آئی سی سی نے پاکستان کی جانب سے میچ ریفری اینڈی پائی کرافٹ کو ہٹانے کی درخواست مسترد کر دی ہے، اس حوالے سے پاکستان کرکٹ بورڈ (پی سی بی) کو آگاہ بھی کر دیا گیا۔
بھارتی ویب سائٹ کی جانب سے دعویٰ کیا گیا ہے کہ آئی سی سی نے پاکستان کے اس مؤقف کو بھی تسلیم نہیں کیا کہ میچ ریفری نے بھارتی ٹیم کے دباؤ پر متنازع اقدام کیا،گراؤنڈ میں موجود ایشین کرکٹ کونسل کے رکن نے ہی پائی کرافٹ کو "ہینڈ شیک” نہ کرنے کے حوالے سے کہا تھا۔
پائی کرافٹ کو پورے ایشیا کپ سے ہٹانے کے بجائے صرف پاکستان کے میچز سے الگ کرنے پر غور کیا جا رہا ہے اور ان میچز میں سابق ویسٹ انڈین کرکٹر رچی رچرڈسن کو میچ ریفری مقرر کرنے کا امکان ہے۔
دوسری جانب گروپ بی میں بھی دلچسپ صورتحال ہے ۔ سری لنکا دونوں میچز جیت کر 4پوائنٹس کے ساتھ سر فہرست ہے جبکہ بنگلہ دیش اور افغانستان آج اہم میچ میں مد مقابل ہیں ۔ بنگلہ دیش شکست کی صورتحال میں سپر فور کی دوڑ سے باہر ہو جائے گا جبکہ افغانستان اگر نہ بھی جیت سکا تو اسے سری لنکا سے میچ کا انتظار کرنا پڑے گا ۔ اگر سری لنکا کیخلاف افغان ٹائیگرز جیت جاتےہیں تو تینوں ٹیموں کے 4پوائنٹس ہو جائیں گے جہاں سپر فور کا فیصلہ رن ریٹ کی بنیاد پر ہوگا ۔