لاہور( پاک ترک نیوز) ناظرین، دنیا کے معروف فٹبالر کرسٹیانو رونالڈو اور ان کی دیرینہ ساتھی جارجینا روڈریگز ایک بار پھر خبروں کی زینت بن گئے ہیں۔ اس بار وجہ ان کی ممکنہ شادی ہے، جس کے حوالے سے بین الاقوامی میڈیا میں نئی رپورٹس سامنے آئی ہیں۔
برطانوی میڈیا رپورٹس کے مطابق 41 سالہ کرسٹیانو رونالڈو اور 32 سالہ جارجینا روڈریگز کی شادی کی تیاریوں سے متعلق اہم تفصیلات منظرعام پر آئی ہیں۔ رپورٹس میں دعویٰ کیا گیا ہے کہ دونوں آئندہ دنوں میں پرتگال کے خوبصورت جزیرے مادیرا کے دارالحکومت فنشال میں رشتۂ ازدواج میں منسلک ہو سکتے ہیں۔
رپورٹس کے مطابق شادی کی تقریب تاریخی فنشال کیتھیڈرل میں منعقد کیے جانے کا امکان ظاہر کیا جا رہا ہے، جبکہ اس کے بعد استقبالیہ تقریب شہر کے معروف فائیو اسٹار ہوٹل "ساوائے پیلس” میں ہونے کی اطلاعات ہیں، جہاں خاندان، قریبی دوستوں اور فٹبال کی دنیا سے تعلق رکھنے والی ممتاز شخصیات کی شرکت متوقع ہے۔
یہ بھی پڑھیں:آج کل کے نوجوان شادی سے کیوں خوفزدہ ہیں؟
یاد رہے کہ کرسٹیانو رونالڈو اور جارجینا روڈریگز کی پہلی ملاقات 2016 میں ہوئی تھی، جس کے بعد دونوں کی رفاقت دنیا بھر میں توجہ کا مرکز بن گئی۔ گزشتہ کئی برسوں سے ان کی شادی سے متعلق مختلف قیاس آرائیاں سامنے آتی رہی ہیں، تاہم دونوں کی جانب سے اب تک کسی حتمی تاریخ یا تقریب کی باضابطہ تصدیق نہیں کی گئی۔
اگر یہ رپورٹس درست ثابت ہوئیں تو رونالڈو اور جارجینا کی شادی رواں برس کی سب سے زیادہ زیرِ بحث رہنے والی تقریبات میں شامل ہو سکتی ہے، جس کا دنیا بھر میں موجود ان کے کروڑوں مداح بے چینی سے انتظار کر رہے ہیں۔
