اسلام آباد ( پاک ترک نیوز) وزیراعظم شہباز شریف نے آزاد جموں و کشمیر قانون ساز اسمبلی کے انتخابات کے دوسرے مرحلے میں پاکستان مسلم لیگ (ن) کی برتری پر پارٹی قائد میاں محمد نواز شریف اور کامیاب امیدواروں کو مبارکباد پیش کی ہے۔
وزیراعظم نے اپنے بیان میں کہا کہ مسلم لیگ (ن) کے کامیاب ہونے والے تمام امیدواروں کو دل کی گہرائیوں سے مبارکباد پیش کرتا ہوں۔
انہوں نے کہا کہ کامیابی کا یہ تسلسل قائد مسلم لیگ (ن) میاں محمد نواز شریف اور پارٹی کی پوری ٹیم کی انتھک محنت کا ثمر ہے۔ ان کے بقول، نواز شریف کی قیادت میں مسلم لیگ (ن) نے آزاد جموں و کشمیر میں انتہائی کامیاب انتخابی مہم چلائی۔
شہباز شریف نے کہا کہ انتخابات میں مسلم لیگ (ن) کی کامیابی آزاد جموں و کشمیر کے عوام کے پارٹی کی پالیسیوں پر اعتماد کا واضح اظہار ہے۔
یہ بھی پڑھیں: سینیٹرز کی پگڑی کیوں اچھالی گئی؟ چکری سگریٹ کیس پر سینیٹ کمیٹی برہم
وزیراعظم نے اس عزم کا اظہار کیا کہ آزاد جموں و کشمیر کی ترقی، خوشحالی اور وہاں کے عوام کی فلاح و بہبود مسلم لیگ (ن) کی اولین ترجیحات میں شامل رہے گی۔
انہوں نے کہا کہ آزاد کشمیر قانون ساز اسمبلی کے انتخابات کے دوسرے مرحلے میں مختلف سیاسی جماعتوں کی بھرپور شرکت خوش آئند ہے اور اس سے خطے میں جمہوری عمل مزید مضبوط ہوگا۔
