اسلام آباد ( پاک ترک نیوز) آزاد کشمیر انتخابات میں مبینہ دھاندلی کے معاملے پر پاکستان پیپلز پارٹی اور مسلم لیگ (ن) کے درمیان مذاکرات کا تیسرا دور بھی کسی حتمی نتیجے کے بغیر ختم ہو گیا۔
ذرائع کے مطابق دونوں جماعتوں کے وفود کے درمیان ہونے والے مذاکرات میں مختلف امور پر تبادلہ خیال کیا گیا، تاہم کسی مشترکہ لائحہ عمل یا فیصلے پر اتفاق نہ ہو سکا۔ اجلاس کے اختتام پر دونوں جماعتوں کے رہنما نجی ہوٹل سے روانہ ہو گئے۔
ذرائع کا کہنا ہے کہ مسلم لیگ (ن) نے انتخابات میں مبینہ دھاندلی سے متعلق اپنے شواہد پاکستان پیپلز پارٹی کے وفد کے سامنے پیش کیے، جن کا پیپلز پارٹی نے جائزہ لیا۔
یہ بھی پڑھیں: سندھ میں اسکول یکم اگست کو کھلیں گے
ذرائع کے مطابق پیپلز پارٹی پیش کیے گئے شواہد پر اپنی مرکزی قیادت سے مشاورت کرے گی، جس کے بعد آئندہ کے لائحہ عمل کا فیصلہ کیا جائے گا۔
ذرائع نے مزید بتایا کہ دونوں جماعتوں کے درمیان مذاکرات کا چوتھا دور آج شام متوقع ہے، جس میں زیرِ بحث معاملات پر مزید غور کیا جائے گا اور کسی مشترکہ مؤقف تک پہنچنے کی کوشش کی جائے گی۔
