اسلام آباد ( پاک ترک نیوز) سوئی سدرن گیس کمپنی نے واٹس ایپ پر وائرل ہونے والے گیس فراہمی کے مبینہ شیڈول کو جعلی قرار دیتے ہوئے واضح کیا ہے کہ کمپنی نے ایسا کوئی نوٹیفکیشن جاری نہیں کیا۔
سوشل میڈیا پر گردش کرنے والے اردو پیغام میں دعویٰ کیا گیا تھا کہ گیس روزانہ صبح 5:30 سے 8:30 بجے، دوپہر 11:30 سے 1:30 بجے اور شام 5:30 سے 8:30 بجے تک دستیاب ہوگی، جبکہ ان اوقات کے علاوہ گیس کی فراہمی محدود یا بند رہے گی۔
یہ پیغام خاص طور پر کراچی سمیت مختلف علاقوں میں واٹس ایپ گروپس پر تیزی سے پھیل گیا، جس کے باعث صارفین میں تشویش پیدا ہوئی۔
ایس ایس جی سی کے ترجمان سلمان احمد صدیقی نے اس دعوے کو مسترد کرتے ہوئے کہا کہ وائرل ہونے والا گیس شیڈول مکمل طور پر جعلی ہے اور اس کا کمپنی سے کوئی تعلق نہیں۔
یہ بھی پڑھیں: حکومت کی بجلی کے بعد گیس کی قیمت بڑھانے کی تیاری
انہوں نے کہا کہ سوئی سدرن گیس کمپنی اپنی تمام سرکاری اطلاعات صرف اپنی سرکاری ویب سائٹ اور پرنٹ و الیکٹرانک میڈیا کے ذریعے جاری کرتی ہے۔ ان کا کہنا تھا کہ سوشل میڈیا پر محض لائکس اور توجہ حاصل کرنے کے لیے اس نوعیت کی متعدد جھوٹی پوسٹس پھیلائی جا رہی ہیں۔
ایس ایس جی سی نے صارفین سے اپیل کی ہے کہ گیس کی فراہمی یا دیگر سروسز سے متعلق معلومات صرف کمپنی کے سرکاری ذرائع سے حاصل کریں اور غیر مصدقہ سوشل میڈیا پیغامات پر یقین نہ کریں۔
