بیجنگ ( پاک ترک نیوز) چین کی جے-35 اسٹیلتھ فائٹر کی بڑے پیمانے پر پیداوار، پاکستان کی خریداری کا منصوبہ خطے میں طاقت کا توازن بدل سکتا ہے۔
چین نے اپنے جدید جے-35 پانچویں نسل کے اسٹیلتھ جنگی طیارے کی بڑے پیمانے پر پیداوار شروع کر دی ہے، جبکہ پاکستان کو اس طیارے کی برآمد کی تیاریوں نے جنوبی ایشیا میں فضائی طاقت کے توازن پر نئی بحث چھیڑ دی ہے۔
رپورٹس کے مطابق شینیانگ ایئرکرافٹ کارپوریشن نے ایک نیا جدید پیداواری کمپلیکس فعال کر دیا ہے، جہاں بیک وقت چینی بحریہ، فضائیہ اور برآمدی ماڈل J-35AE کی تیاری کی جا رہی ہے۔ اس اقدام کو چین کی دفاعی صنعت میں ایک اہم سنگ میل قرار دیا جا رہا ہے۔
رپورٹ کے مطابق پاکستان جے-35 اے ای کے 40 طیارے حاصل کرنے کے منصوبے پر کام کر رہا ہے۔ اگر یہ معاہدہ مکمل ہو جاتا ہے تو پاکستان، چین کے پانچویں نسل کے اسٹیلتھ جنگی طیارے حاصل کرنے والا پہلا غیر ملکی ملک بن جائے گا۔
رپورٹ میں کہا گیا ہے کہ یہ ممکنہ دفاعی پیکج صرف جے-35 تک محدود نہیں بلکہ اس میں KJ-500 ایئر بورن ارلی وارننگ اینڈ کنٹرول طیارے اور HQ-19 فضائی دفاعی نظام بھی شامل ہو سکتے ہیں۔
شینیانگ ایئرکرافٹ کارپوریشن نے تقریباً 1.2 ارب امریکی ڈالر کی لاگت سے نیا پیداواری کمپلیکس تعمیر کیا ہے، جس کا رقبہ تقریباً 4.2 مربع کلومیٹر ہے۔
اس کمپلیکس میں 3 لاکھ 70 ہزار مربع میٹر سے زائد مینوفیکچرنگ ایریا اور 3,660 میٹر طویل رن وے بھی موجود ہے، جہاں تیار ہونے والے طیاروں کی فوری آزمائشی پروازیں کی جا سکتی ہیں۔
چینی حکام کا کہنا ہے کہ آئندہ 3 سے 5 برس میں جنگی طیاروں کی مجموعی پیداواری صلاحیت دوگنی کر دی جائے گی، جس کے لیے خودکار اور ڈیجیٹل مینوفیکچرنگ ٹیکنالوجی استعمال کی جا رہی ہے۔
رپورٹ کے مطابق جے-35 کا بحریہ کے لیے تیار کیا گیا ماڈل چین کے نئے طیارہ بردار جہاز فوجیان پر تعینات کیا جا چکا ہے، جہاں یہ الیکٹرو میگنیٹک کیٹاپلٹ کے ذریعے کامیاب پروازیں بھر رہا ہے۔
یہ بھی پڑھیں: چین کا چھٹی نسل کا جے-36، آسمانوں کا نیا بادشاہ؟
دوسری جانب J-35A کو باقاعدہ طور پر چینی فضائیہ میں شامل کر لیا گیا ہے، جہاں یہ بھاری بھرکم J-20 کے ساتھ مل کر خدمات انجام دے گا۔
دفاعی ماہرین کے مطابق اگر پاکستان کو جے-35 طیارے مل جاتے ہیں تو جنوبی ایشیا میں فضائی برتری کے توازن پر نمایاں اثرات مرتب ہو سکتے ہیں، خصوصاً بھارت اور پاکستان کے درمیان اسٹریٹجک ماحول میں نئی تبدیلیاں سامنے آ سکتی ہیں۔
