کراچی ( پاک ترک نیوز) کراچی میں ایک بار پھر کوکین کوئین انمول پنکی نیٹ ورک فعال ہونا شروع ہوگیا،کراچی کے کسی بھی حصے میں 40 سے 50 منٹ میں پنکی کی کوکین ڈیلور ہونے کا انکشاف ہوا ہے۔
پرانے نمبر بند ہونے کے بعد نئے نمبرز سے کوکین کے کسٹمرز کو میسجز ملنا شروع ہوگئے،پنکی کوکین نیٹ ورک فعال ہونے کے بعد کوکین کے خریداروں کے لئے آفر بھی لگادی گئی۔گولڈن کوکین اسٹف 25 ہزار اور سلور کوکین اسٹف 15 ہزار میں فروخت کیا جانے لگا۔گولڈن کوکین اسٹف کے چار پیکٹ خریدنے پر ایک گولڈن کوکین اسٹف فری دیا جارہا ہے۔
کوکین آرڈر کرنے اور ڈیلوری سے متعلق معلومات کے لئے دو نئے نمبر دیئے گئے، آرڈر کرنے کے ساتھ رقم بھی آن لائن کرنی پڑے گی، رمشاء نامی خاتون کے اکاؤئنٹ میں کوکین کی رقم لی جارہی ہے، کوکین ڈیلور کروانے والے کی آڈیو میسج بھی سامنے آگیا۔
یہ بھی پڑھیں: کوکین کوئین انمول عرف پنکی کے مالیاتی ریکارڈ کی چھان بین
آڈیو پیغام میں کہا گیا پیمنٹ آن لائن ہوگی، کیش پیمنٹ نہ پہلے پنکی کے ٹائم تھا نہ اب ہوگا،فراڈ والا کوئی سین نہیں ہے آن لائن رقم بھیجے گے تو آپ کی جگہ پر سامان مل جائے گا،پنکی کا نمبر کسی نے آن کیا ہوا ہے تو وہ کوئی عام لڑکا تو نہیں ہے۔
آڈیو میسیج کے مطابق آپ پیمنٹ کروائے آپکو سامان آپکی جگہ پر پہنچائے گے جو پنکی کی زبان وہ میری زبان ہے، کراچی کے ڈسٹرکٹ ساوتھ کے تھانہ درخشاں، گزری،ڈیفنس،بوٹ بیسن،کلفٹن،ساحل تھانے کی حدود میں 15 سے 20 منٹ میں کوکین ڈیلور ہورہی ہے۔
