کویت سٹی ( پاک ترک نیوز) کویت کی وزارت داخلہ نے گھریلو ملازمین کی بھرتی صرف 10 منظور شدہ ممالک تک محدود کر دی جبکہ 27 ممالک سے گھریلو کارکنوں کی بھرتی پر پابندی لگا دی گئی ۔
فیصلہ وزارت خارجہ، وزارت صحت اور پبلک اتھارٹی فار مین پاور سمیت مختلف سرکاری اداروں کی سفارشات اور مشاہدات کی بنیاد پر کیا گیا۔
نئے ضوابط کے تحت گھریلو ملازمین کی بھرتی جنوبی افریقا، اریٹیریا، ایتھوپیا، فلپائن، سری لنکا، بھارت، ویتنام، نیپال اور سینیگال سے کی جا سکے گی۔ سینیگال سے صرف مرد گھریلو کارکنوں کی بھرتی کی اجازت ہوگی۔ بھرتی کا عمل ملک کے مختلف گورنریٹ دفاتر کے ذریعے مکمل کیا جائے گا۔
فیصلے کے تحت 27 ممالک سے گھریلو ملازمین کی بھرتی پر پابندی عائد کی گئی ۔ ان ممالک میں مڈغاسکر، بھوٹان، کینیا، یوگنڈا، نائیجیریا، ٹوگو، ملاوی، چاڈ، جبوتی، نائجر، گنی، گنی بساؤ، کیپ وردے، سیرا لیون، لائبیریا، مالی، برکینا فاسو، گیمبیا، کیمرون، استوائی گنی، وسطی افریقی جمہوریہ، جمہوریہ کانگو، جمہوری جمہوریہ کانگو، روانڈا، برونڈی اور انگولا شامل ہیں۔
حکام کے مطابق بعض ممالک کے لیے پابندی صرف خواتین گھریلو ملازمین پر لاگو ہوگی، جبکہ مرد کارکنوں کی بھرتی کی اجازت برقرار رہے گی۔
