اسلام آباد ( پاک ترک نیوز) وزیراعظم شہباز شریف کی زیرِ صدارت قومی اقتصادی کونسل کا اجلاس ہوا جس میں ملک کی معاشی اور ترقیاتی ترجیحات کا جائزہ لیا گیا ،اجلاس میں پنجاب کیلئے 605 ارب روپے ،سندھ 450 ارب ،کے پی 305 ارب روپےاور بلوچستان کیلئے 275 ارب روپے کا ترقیاتی بجٹ کی منظوری دی گئی۔
اجلاس میں ملک کی پائیدار معاشی ترقی کے لیے مشترکہ حکمت عملی اختیار کرنے پر اتفاق کیا گیا۔ قومی ترقیاتی پروگرام کے تحت انفراسٹرکچر، توانائی اور سماجی شعبوں کو ترجیح دینے کا فیصلہ کیا گیا۔
وزیراعظم شہبازشریف نے ترقیاتی فنڈز کے مؤثر اور شفاف استعمال کو یقینی بنانے پر زور دیا ۔ روزگار کے مواقع پیدا کرنے اور معاشی سرگرمیوں کے فروغ پر خصوصی توجہ دینے کا فیصلہ کیا گیا۔ صوبوں کے جاری اور نئے منصوبوں کے لیے وسائل کی منصفانہ تقسیم پر اتفاقہو گیا ۔وزیراعظم شہباز شریف نے کہامحدود وسائل کے باوجود ترقیاتی عمل کا تسلسل برقرار رکھا جائے گا۔
اجلاس میں نائب وزیراعظم اسحاق ڈار ،وزیر خزانہ محمداورنگزیب ، سندھ، بلوچستان اور خیبرپختونخوا کے وزرائے اعلیٰ شریک ہوئے۔ وزیر اعلیٰ پنجاب مریم نواز نے ویڈیو لنک کے ذریعے اجلاس میں شرکت کی۔
