وزیراعظم شہبازشریف سے نیوزی لینڈ کے وزیراعظم کا ٹیلیفونک رابطہ

اسلام آباد ( پاک ترک نیوز) وزیراعظم شہباز شریف سے نیوزی لینڈ کے وزیراعظم نے ٹیلیفونک رابطہ کیا ہے،دونوں رہنماؤں نے مشرقِ وسطیٰ کی بدلتی ہوئی صورتحال پر تبادلۂ خیال کیا۔
وزیراعظم نے ہم منصب کو خطے میں امن کے فروغ اور کشیدگی میں کمی کے لیے پاکستان کی جاری سفارتی کوششوں اور روابط سے آگاہ کیا۔ وزیراعظم شہبازشریف نے خطے اور دنیا میں امن، مکالمے اور استحکام کے فروغ کے لیے پاکستان کے غیر متزلزل عزم کا اعادہ کیا۔
نیوزی لینڈ کے وزیر اعظم نے پاکستان کی تعمیری سفارتی کاوشوں، واشنگٹن اور تہران کے ساتھ رابطوں کو سراہا،دونوں رہنماؤں نے پاکستان اور نیوزی لینڈ کے درمیان دوطرفہ تعلقات کو مزید مضبوط بنانے کے لیے مل کر کام کرنے پر اتفاق کیا،دونوں ممالک کے مابین دوستانہ اور خوشگوار تعلقات پر اطمینان کا اظہار کیا گیا ۔وزیراعظم نے نیوزی لینڈ کے وزیراعظم کو پاکستان کے سرکاری دورے کی پُرتپاک دعوت دی۔