مظفر آباد(پاک ترک نیوز )وفاقی وزیر امور کشمیر و گلگت بلتستان انجینئر امیر مقام نے چیئرمین پیپلز پارٹی بلاول بھٹو زرداری کی مبینہ "گنتی کی دھمکی” پر سخت ردعمل دیتے ہوئے کہا ہے کہ "ہم گئے تو سب اکٹھے جائیں گے۔”
مظفرآباد میں جلسہ عام سے خطاب کرتے ہوئے امیر مقام نے کہا کہ پیپلز پارٹی کو یاد رکھنا چاہیے کہ وہ خود بھی اسی نظام کا حصہ ہے اور اہم آئینی عہدوں پر فائز ہے، اس لیے ایسے بیانات دینا مناسب نہیں۔
انہوں نے کہا کہ میرپور کے عوام نے مسلم لیگ (ن) پر اعتماد کا اظہار کیا ہے، جبکہ پیپلز پارٹی کو چاہیے کہ وہ یہ جائزہ لے کہ عوام نے اسے کیوں مسترد کیا۔
وفاقی وزیر کا کہنا تھا کہ آزاد کشمیر میں حکومت اور انتظامیہ بھی پیپلز پارٹی کے زیرِ اثر ہے، اس لیے بے بنیاد الزامات عائد کرنے کے بجائے عوام کے فیصلے کا احترام کیا جانا چاہیے۔
امیر مقام نے مزید کہا کہ سیاسی جماعتوں کو انتخابی نتائج تسلیم کرتے ہوئے جمہوری رویوں کو فروغ دینا چاہیے، کیونکہ عوام کا فیصلہ ہی حتمی ہوتا ہے۔
بلاول بھٹو زرداری نے آزاد کشمیر کے انتخابات کے نتائج پر تحفظات کا اظہار کرتے ہوئے کہا تھا کہ اگر ووٹوں کی گنتی شفاف نہ ہوئی اور مبینہ بے ضابطگیوں کا ازالہ نہ کیا گیا تو پھر وفاقی حکومت نہیں رہے گی۔
