امریکی امیگرنٹ ویزا پروسیسنگ جلد بحال ہونے کی توقع ہے، دفتر خارجہ

اسلام آباد: (پاک ترک نیوز)پاکستانی دفتر خارجہ نے تصدیق کی ہے کہ امریکی امیگرنٹ ویزا کی معطلی کے بعد واشنگٹن کے ساتھ رابطے جاری ہیں اور اُمید ہے کہ ویزا کی معمول کی آن لائن پروسیسنگ جلد دوبارہ شروع ہو جائے گی۔
دفتر خارجہ کے ترجمان طاہر اندرابی نے بتایا کہ یہ مسئلہ پاکستانی شہریوں کے لیے اہمیت کا حامل ہے اور حکومت اس پر سنجیدگی سے کام کر رہی ہے۔ امریکی امیگریشن پالیسیوں کا یہ جائزہ ایک روٹین عمل ہے، لیکن پاکستانی شہریوں کی سہولت کو مدنظر رکھتے ہوئے رابطے جاری ہیں۔
ترجمان نے یقین دلایا کہ حکومت تمام ممکنہ اقدامات کر رہی ہے تاکہ ویزا کی معطلی سے پیدا ہونے والی مشکلات کا جلد از جلد حل نکالا جا سکے اور پروسیسنگ کے معمولات جلد بحال ہوں۔
خیال رہے کہ امریکا نے 21 جنوری 2026 سے پاکستان سمیت 75 ممالک کے شہریوں کے امیگرنٹ ویزا درخواستوں پر کارروائی غیر معینہ مدت کے لیے روک دی تھی۔
ان ویزوں کے ذریعے درخواست دہندگان امریکا میں مستقل رہائش اختیار کر سکتے تھے، تاہم نئی درخواستوں پر اس فیصلے کے تحت کارروائی معطل رہے گی۔