اسلام آباد (پاک ترک نیوز )پاکستان کی خدمات کی برآمدات میں مالی سال 2026-27 کی پہلی سہ ماہی کے دوران 22.60 فیصد نمایاں اضافہ ریکارڈ کیا گیا ہے، جس کی بنیادی وجہ اطلاعاتی ٹیکنالوجی کے شعبے کی بہتر کارکردگی ہے۔پاکستان ادارہ شماریات کے اعداد و شمار کے مطابق جولائی سے ستمبر 2026 تک خدمات کی برآمدات بڑھ کر 2 ارب 72 کروڑ ڈالر ہوگئیں، جبکہ گزشتہ مالی سال کی اسی مدت میں یہ آمدن 2 ارب 22 کروڑ ڈالر تھی۔
اعداد و شمار کے مطابق ستمبر میں خدمات کی برآمدات 15.35 فیصد اضافے کے ساتھ 92 کروڑ 98 لاکھ 70 ہزار ڈالر تک پہنچ گئیں۔ٹیلی کمیونیکیشن، کمپیوٹر اور معلوماتی خدمات کی برآمدات میں بھی نمایاں اضافہ ہوا۔ پہلی سہ ماہی کے دوران اس شعبے سے حاصل ہونے والی آمدن 17.7 فیصد اضافے کے ساتھ ایک ارب 24 کروڑ 60 لاکھ ڈالر ریکارڈ کی گئی، جبکہ گزشتہ سال یہ ایک ارب 5 کروڑ 90 لاکھ ڈالر تھی۔دیگر کاروباری خدمات کی برآمدات میں 27.98 فیصد اضافہ ہوا اور یہ 62 کروڑ 20 لاکھ ڈالر تک پہنچ گئیں، جبکہ نقل و حمل کی خدمات کی برآمدات 9.66 فیصد اضافے سے 29 کروڑ 50 لاکھ ڈالر رہیں۔
یہ بھی پڑھیں: ایران کے 38 پل امریکی نشانے پر ہیں، ایک گھنٹے میں تباہ کرسکتے ہیں، ڈونلڈ ٹرمپ
دوسری جانب خدمات کی درآمدات میں بھی اضافہ ریکارڈ کیا گیا۔ پہلی سہ ماہی کے دوران درآمدات 16.32 فیصد بڑھ کر 3 ارب 55 کروڑ ڈالر ہوگئیں، جبکہ گزشتہ سال اسی مدت میں یہ 3 ارب 5 کروڑ ڈالر تھیں۔اعداد و شمار کے مطابق خدمات کی تجارت کا خسارہ معمولی کمی کے بعد 83 کروڑ 21 لاکھ 60 ہزار ڈالر رہا، جبکہ گزشتہ سال اسی مدت میں یہ 83 کروڑ 48 لاکھ 80 ہزار ڈالر تھا۔
واضح رہے کہ مالی سال 2025-26 کے دوران پاکستان کی خدمات کی برآمدات 18.81 فیصد اضافے سے 10 ارب 4 کروڑ ڈالر تک پہنچ گئی تھیں، جو ملکی معیشت میں خدمات اور آئی ٹی شعبے کی بڑھتی ہوئی اہمیت کو ظاہر کرتی ہیں۔
