تہران(پاک ترک نیوز ) وفاقی وزیر داخلہ محسن نقوی ایران پہنچ گئے ہیں، جہاں وہ اعلیٰ ایرانی حکام سے اہم ملاقاتیں کریں گے۔
ایرانی سرکاری خبر رساں ادارے کے مطابق محسن نقوی تہران میں ایرانی حکام کے ساتھ ملاقاتوں میں مختلف اہم معاملات پر تبادلہ خیال کریں گے۔ رپورٹس کے مطابق ان کی ملاقاتوں میں ایرانی وزیر خارجہ عباس عراقچی سمیت دیگر اہم حکام بھی شامل ہوسکتے ہیں۔
محسن نقوی کا یہ دورہ ایسے وقت میں ہو رہا ہے جب امریکا اور ایران کے درمیان کشیدگی اور مذاکرات کا معاملہ خطے کی صورتحال پر گہرے اثرات مرتب کر رہا ہے۔ پاکستان پہلے ہی دونوں ممالک کے درمیان کشیدگی کم کرنے اور سفارتی رابطوں کو آگے بڑھانے کے لیے متحرک کردار ادا کر رہا ہے۔
رپورٹس کے مطابق محسن نقوی اس دورے کے دوران ایرانی حکام کو پاکستان کے مؤقف اور خطے میں امن کے حوالے سے اسلام آباد کی کوششوں سے آگاہ کریں گے۔
یہ بھی پڑھیں : ٹرمپ کا ایران سے جنگی نقصانات کا معاوضہ لینے کا اعلان
ایرانی میڈیا کے مطابق پاکستان کی جانب سے امریکا اور ایران کے درمیان مذاکرات کی بحالی اور دونوں فریقوں کے درمیان اختلافات کم کرنے کے لیے سفارتی کوششیں جاری ہیں۔ محسن نقوی کی تہران میں اعلیٰ سطح کی ملاقاتیں بھی اسی سلسلے کی کڑی قرار دی جا رہی ہیں۔
ذرائع کے مطابق ملاقاتوں میں خطے کی موجودہ سکیورٹی صورتحال، ایران اور امریکا کے درمیان جاری کشیدگی، مذاکراتی عمل اور علاقائی امن و استحکام سمیت اہم امور زیر بحث آسکتے ہیں۔
