لاہور(پاک ترک نیوز ) حضرت داتا گنج بخش علی ہجویریؒ کے 983ویں سالانہ عرس کے موقع پر لاہور ٹریفک پولیس نے تین روزہ خصوصی ٹریفک پلان جاری کر دیا ہے۔ عرس کی تقریبات کے دوران ٹریفک کی روانی برقرار رکھنے اور زائرین کی سہولت کے لیے خصوصی انتظامات کیے گئے ہیں۔
ٹریفک پولیس کے مطابق ایس ایس پی سٹی زون مقصود لون ٹریفک آپریشن کی نگرانی کریں گے۔ پلان کے تحت 5 ڈی ایس پیز، 111 ٹریفک انسپکٹرز اور 900 ٹریفک وارڈنز تعینات کیے جائیں گے، جبکہ غلط پارک کی گئی گاڑیوں کو ہٹانے اور ٹریفک کی روانی برقرار رکھنے کے لیے 15 فورک لفٹرز اور 4 بریک ڈاؤن گاڑیاں بھی موجود ہوں گی۔
زائرین کی سہولت کے لیے 5 پارکنگ اسٹینڈز مختص کیے گئے ہیں۔ دودھ سپلائی کرنے والی گاڑیوں، ریڑھی بانوں اور رکشوں کو آزادی فلائی اوور اور پیر مکی کے راستے سبیلوں تک جانے کی اجازت ہوگی۔سکیورٹی کے پیش نظر کچہری چوک، بھاٹی چوک اور پیر مکی سے داتا دربار تک جانے والی سڑک ہر قسم کی ٹریفک کے لیے بند رہے گی۔
شاہدرہ سے لوئر مال آنے والی ٹریفک کو آزادی چوک سے ریلوے اسٹیشن کی جانب موڑ دیا جائے گا۔شاہدرہ سے لوئر مال جانے والے دوسرے روٹ کے لیے نیازی شہید چوک، بند روڈ اور سگیاں کا راستہ استعمال کیا جائے گا۔
چوبرجی چوک سے لوئر مال اور داتا صاحب کی جانب آنے والی ٹریفک کو ایم اے او کالج سے متبادل راستوں پر منتقل کیا جائے گا۔اندرون سرکلر روڈ سے آنے والی ٹریفک موری گیٹ، اردو بازار اور کچہری روڈ کے ذریعے اپنی منزل تک پہنچ سکے گی۔ڈسٹرکٹ کورٹس چوک، ڈی آئی جی آپریشنز آفس کے کونے اور گورنمنٹ کالج یونیورسٹی کے آر/او گیٹ سے لوئر مال میں داخلے کی اجازت نہیں ہوگی۔
ریٹی گن چوک، بلال گنج چوک، بیری والا چوک اور موری گیٹ سے داتا دربار کی جانب ٹریفک کا داخلہ بند رہے گا۔اسی طرح ٹیکسالی چوک، موری گیٹ اور آزادی چوک سے بھی لوئر مال روڈ پر ٹریفک کے داخلے کی اجازت نہیں ہوگی۔شاہدرہ سے اپر مال جانے والے شہریوں کو ریلوے اسٹیشن اور پریس کلب کے راستے استعمال کرنے کی ہدایت کی گئی ہے۔
لاہور ٹریفک پولیس نے شہریوں سے اپیل کی ہے کہ وہ سفر سے قبل راستہ ایف ایم اور راستہ ایپ کے ذریعے ٹریفک کی تازہ صورتحال معلوم کریں، جبکہ کسی بھی رہنمائی یا مدد کے لیے پنجاب پولیس ہیلپ لائن 15 پر رابطہ کیا جا سکتا ہے۔
