لاہور(پاک ترک نیوز)لاہور میں ٹریفک حادثات کی روک تھام کے لیے ڈرائیوروں کا طبی معائنہ لازمی قرار دینے کی تجویز پیش کر دی گئی، جس کے تحت نظر، رنگوں میں فرق کرنے کی صلاحیت اور رات کے وقت دیکھنے کی صلاحیت جانچی جائے گی۔
چیف ٹریفک آفیسر لاہور سید عبد الرحیم شیرازی نے ڈرائیوروں کی طبی جانچ کے لیے سروسز اسپتال اور میاں منشی اسپتال میں خصوصی کاؤنٹرز قائم کرنے کی درخواست کی ہے۔
تجویز کے مطابق ان کاؤنٹرز پر ڈرائیوروں کی نظر کی کمزوری، کلر بلائنڈنس اور رات کے وقت دیکھنے میں دشواری کا معائنہ کیا جائے گا، جبکہ ان کی نفسیاتی کیفیت کا جائزہ لینے کے لیے بھی ٹیسٹ کیے جائیں گے۔
چیف ٹریفک آفیسر کا کہنا ہے کہ محفوظ ڈرائیونگ کے لیے ڈرائیوروں کا طبی طور پر فٹ ہونا ضروری ہے۔ نظر کی کمزوری اور رنگوں میں فرق نہ کر پانا ٹریفک حادثات کا سبب بن سکتا ہے۔
انہوں نے بس اڈوں اور ٹرانسپورٹ ٹرمینلز پر موبائل میڈیکل ٹیمیں تعینات کرنے کی بھی درخواست کی ہے، تاکہ ڈرائیوروں کا موقع پر طبی معائنہ کیا جا سکے اور ان کی صحت کا جائزہ لیا جا سکے۔
یہ بھی پڑھیں: بچوں کی کفالت والدین کی علیحدگی سے ختم نہیں ہوتی، لاہور ہائیکورٹ
سید عبد الرحیم شیرازی کے مطابق ان اقدامات سے طبی طور پر ڈرائیونگ کے لیے غیر موزوں افراد کی نشاندہی ممکن ہوگی، جس سے حادثات کی روک تھام اور قیمتی جانیں بچانے میں مدد مل سکتی ہے۔
مجوزہ اقدام کے تحت ٹریفک سیفٹی کے نظام میں گاڑیوں کی فٹنس جانچنے کے ساتھ ڈرائیوروں کی جسمانی اور نفسیاتی صحت کو بھی اہمیت دی جائے گی۔
