باجوڑ(پاک ترک نیوز ) خیبرپختونخوا میں گزشتہ دو ماہ سے جاری آپریشن "11 گرج” کے تحت سیکیورٹی فورسز کی انٹیلی جنس بیسڈ کارروائیاں بدستور جاری ہیں۔ سیکیورٹی ذرائع کے مطابق مختلف کارروائیوں میں متعدد خوارج ہلاک ہوئے، جبکہ ان کے ٹھکانوں کو بھی تباہ کر دیا گیا۔
سیکیورٹی ذرائع کا کہنا ہے کہ آپریشن کے دوران دہشت گردوں کے کئی سہولت کاروں کو گرفتار کیا گیا، جبکہ بھاری مقدار میں اسلحہ، گولہ بارود اور دیگر جنگی سامان بھی برآمد کیا گیا۔
ذرائع کے مطابق باجوڑ کے علاقے شاکرو میں انٹیلی جنس اطلاعات کی بنیاد پر کی گئی کارروائی میں سیکیورٹی فورسز نے خوارج کے ٹھکانوں کو مؤثر انداز میں نشانہ بنایا، جس کے نتیجے میں متعدد دہشت گردوں کے ہلاک اور زخمی ہونے کی اطلاعات ہیں۔
سیکیورٹی ذرائع کے مطابق آپریشن "11 گرج” کے دوران دہشت گردوں کے زیر استعمال دیسی ساختہ بم بھی ناکارہ بنا کر تباہ کر دیے گئے، جبکہ زمینی دستوں اور کواڈ کاپٹرز کی مدد سے کارروائیاں جاری ہیں، جن کے باعث دہشت گردوں کو مقامی آبادی سے دور بھاگنے پر مجبور کیا جا رہا ہے۔
ذرائع کا مزید کہنا ہے کہ تمام کارروائیوں کے دوران شہریوں کے جان و مال کے تحفظ کو اولین ترجیح دی جا رہی ہے اور اس بات کو یقینی بنایا جا رہا ہے کہ مقامی آبادی کو کسی قسم کا نقصان نہ پہنچے۔
سیکیورٹی ذرائع کے مطابق سیکیورٹی فورسز دہشت گردی کے مکمل خاتمے اور خیبرپختونخوا میں پائیدار امن کے قیام تک بلا تعطل کارروائیاں جاری رکھنے کے عزم پر قائم ہیں۔
