لاہور(پاک ترک نیوز )نجی بس کمپنی ویڈا نے لاہور میٹرو بس سروس 11 اگست سے بند کرنے کی دھمکی دے دی۔
نجی کمپنی نے پنجاب ماس ٹرانزٹ اتھارٹی کو باضابطہ خط لکھ دیا، خط میں مؤقف اختیار کیا گیا ہے کہ کمپنی کے پاس بسیں چلانے کے لیے تیل خریدنے کے مزید وسائل موجود نہیں۔
ویڈا نے پنجاب ماس ٹرانزٹ اتھارٹی سے بسوں کے آپریشن کے لیے تیل فراہم کرنے کا مطالبہ کرتے ہوئے کہا ہے کہ پی ایم اے عدالتی فیصلے پر بھی عمل درآمد کرے۔
دوسری جانب سیکرٹری ٹرانسپورٹ پنجاب کا کہنا ہے کہ آپریٹر کی مالی صورتحال اگرچہ انتہائی خراب ہے، تاہم حکومت انہیں انگیج رکھے گی اور بس آپریشن بند نہیں ہونے دے گی۔
سیکرٹری ٹرانسپورٹ کے مطابق کنٹریکٹ کے تحت پنجاب حکومت آپریٹر کو بروقت ادائیگیاں کرتی رہی ہے، آپریٹر کے کنٹریکٹ کی مدت ابھی باقی ہے، تاہم موجودہ مسائل آپریٹر نے خود پیدا کیے ہیں۔
ذرائع کے مطابق پنجاب حکومت لاہور میٹرو بس ٹریک پر اپنی گرین بسیں بھی جلد چلانے کا ارادہ رکھتی ہے۔
ذرائع کا کہنا ہے کہ ویڈا نے اپنے کنٹریکٹ کی خلاف ورزی کی ہے، پنجاب حکومت بھی موجودہ صورتحال میں کمپنی کے ساتھ مزید نہیں چل سکتی۔
