جماعت اسلامی کا کل سے چاروں صوبوں میں دھرنوں کا اعلان

لاہور (پاک ترک نیوز )امیر جماعت اسلامی حافظ نعیم الرحمان نے کل سے چاروں صوبوں میں دھرنے شروع کرنے کا اعلان کردیا۔
منصورہ لاہور میں نیوز کانفرنس کرتے ہوئے حافظ نعیم الرحمان نے کہا کہ لاہور میں وزیراعلیٰ ہاؤس جبکہ دیگر صوبوں میں گورنر ہاؤسز کے باہر احتجاج کیا جائے گا۔ حکومت نے احتجاج روکنے کی کوشش کی تو بھرپور جواب دیں گے۔
حافظ نعیم الرحمان کا کہنا تھا کہ پٹرولیم لیوی بھتے کی صورت میں وصول کی جاتی ہے، جبکہ پٹرولیم مصنوعات کی قیمتوں میں اضافے سے ہر چیز مہنگی ہوجاتی ہے۔
انہوں نے کہا کہ مہنگائی کا سب سے زیادہ اثر غریب اور متوسط طبقے پر پڑتا ہے، ملک پر ایلیٹ طبقے کا قبضہ ہے اور ہزاروں ارب روپے کی کرپشن ہورہی ہے۔
امیر جماعت اسلامی نے دعویٰ کیا کہ 17 ارب ڈالر کا ریلیف مخصوص لوگوں کو دیا جارہا ہے، جبکہ آئی پی پیز مالکان کی آمدن سے ٹیکس نہیں لیا جاتا۔
حافظ نعیم الرحمان نے حکومت کی معاشی پالیسیوں اور پٹرولیم مصنوعات کی قیمتوں میں اضافے کو شدید تنقید کا نشانہ بناتے ہوئے کہا کہ جماعت اسلامی عوام کے حقوق کے لیے احتجاج کا سلسلہ جاری رکھے گی۔