راولپنڈی (پاک ترک نیوز )فیلڈ مارشل سید عاصم منیر، نشانِ امتیاز (ملٹری)، ہلالِ جرأت، چیف آف آرمی اسٹاف و چیف آف ڈیفنس فورسز نے یومِ آزادی کے موقع پر پاک فوج کے سابق فوجیوں کے اعزاز میں استقبالیہ دیا، جس میں بڑی تعداد میں ریٹائرڈ افسران اور جوانوں نے شرکت کی۔
آرمی چیف و چیف آف ڈیفنس فورسز نے ملکی دفاع کے لیے سابق فوجیوں کی گراں قدر خدمات اور تاحیات قربانیوں کو خراجِ تحسین پیش کیا۔ انہوں نے قومی استقامت مضبوط بنانے میں سابق فوجیوں کے دیرپا کردار کو بھی سراہا۔
فیلڈ مارشل سید عاصم منیر نے کہا کہ موجودہ پیچیدہ اور بدلتے ہوئے سکیورٹی ماحول میں سابق فوجیوں کا تجربہ، رہنمائی اور مسلسل تعاون پاک فوج کے لیے ایک قیمتی ادارہ جاتی اثاثہ ہے۔
اس موقع پر سابق فوجیوں نے پاک فوج کی قیادت پر مکمل اعتماد کا اظہار کرتے ہوئے ابھرتے ہوئے سکیورٹی چیلنجز سے نمٹنے میں مسلح افواج کی مسلسل حمایت جاری رکھنے کے عزم کا اعادہ کیا۔
سابق فوجیوں نے قومی اتحاد، امن، استحکام اور ملکی خوشحالی کے لیے اپنا کردار جاری رکھنے کا بھی عہد کیا۔
