راولپنڈی (پاک ترک نیوز ) پاک فوج نے پاک افغان سرحد پر دراندازی کی کوشش ناکام بناتے ہوئے 12 خوارج اور افغان طالبان کو ہلاک کر دیا، فائرنگ کے تبادلے میں پاک فوج کے نائب صوبیدار ہدایت امان نے جامِ شہادت نوش کیا۔
پاک فوج کے شعبۂ تعلقاتِ عامہ کے مطابق سکیورٹی فورسز نے کرم کے علاقے میں پاک افغان سرحد کے ذریعے پاکستان میں داخل ہونے کی کوشش کرنے والے گروہ کی نقل و حرکت کا پتا چلایا۔ دراندازی کی کوشش کے دوران خوارج کی معاونت کے لیے افغان طالبان کی چوکیوں سے بھی فائرنگ کی گئی، جس کے بعد فائرنگ کا تبادلہ ہوا۔
آئی ایس پی آر کے مطابق شہید نائب صوبیدار ہدایت امان کی عمر 40 سال تھی اور ان کا تعلق ضلع غذر سے تھا۔
ترجمان پاک فوج نے کہا کہ یہ واقعہ پاکستان کے اس مؤقف کی تصدیق کرتا ہے کہ افغان سرزمین کو دہشت گرد تنظیمیں پاکستان کے خلاف استعمال کر رہی ہیں۔ آئی ایس پی آر کے مطابق افغان طالبان حکومت سرحد پار دہشت گردی روکنے کے بجائے اس کی معاونت کر رہی ہے اور اپنی بین الاقوامی ذمہ داریاں پوری کرنے میں ناکام رہی ہے۔
آئی ایس پی آر کا کہنا ہے کہ علاقے میں موجود دیگر بھارتی سرپرستی یافتہ خوارج کے خاتمے کے لیے کلیئرنس آپریشن بھی کیا گیا۔ سکیورٹی فورسز اور قانون نافذ کرنے والے اداروں کی انسدادِ دہشت گردی کارروائیاں جاری رہیں گی۔
ترجمان پاک فوج نے واضح کیا کہ بیرونی سرپرستی اور معاونت سے ہونے والی دہشت گردی کے خاتمے کے لیے کارروائیاں جاری رکھی جائیں گی، جبکہ بہادر سپاہیوں کی قربانیاں ملکی سرحدوں کے دفاع کے عزم کو مزید مضبوط کرتی ہیں۔
