اسلام آباد (پاک ترک نیوز )وفاقی وزیر احد چیمہ اور وزیر توانائی سردار اویس لغاری کی زیرِ صدارت بجلی چوری سے متعلق کمیٹی کا اجلاس ہوا، جس میں بجلی چوری اور ڈسکوز کے نقصانات کی اصل وجوہات جاننے کے لیے تمام ڈسکوز کا تکنیکی آڈٹ کرانے کا فیصلہ کیا گیا۔
اجلاس میں بتایا گیا کہ تکنیکی آڈٹ کے لیے جلد ایکسپریشن آف انٹرسٹ جاری کیا جائے گا، جبکہ آڈٹ کے ضابطۂ کار کو آئندہ ہفتے تک حتمی شکل دے دی جائے گی۔
احد چیمہ نے کہا کہ بجلی چوری یا نظام کی خامیوں کا بوجھ عوام پر منتقل نہیں ہونے دیا جائے گا، زائد بلنگ کسی طور قابلِ قبول نہیں۔ ان کا کہنا تھا کہ حکومت بجلی چوری روکنے کے لیے پُرعزم ہے اور بجلی چوری و تقسیم کے نقصانات کم کرنے کے لیے شواہد پر مبنی اقدامات کیے جائیں گے۔
وزارتِ آئی ٹی تکنیکی آڈٹ کے لیے معاونت فراہم کرے گی، جبکہ ڈیجیٹل ذرائع کے ذریعے بے ضابطگیوں کی نشاندہی، نگرانی اور جواب دہی کا نظام مزید بہتر بنایا جائے گا۔
اجلاس میں پیسکو اور کیسکو کے زیادہ نقصانات والے علاقوں میں سولرائزیشن کے پائلٹ منصوبوں پر بھی بریفنگ دی گئی۔
کمیٹی نے رواں سال ڈسکوز کی ریکوری میں بہتری پر اطمینان کا اظہار کرتے ہوئے بہتر نگرانی اور ہدفی اقدامات کے ذریعے ڈسکوز کی کارکردگی مزید بہتر بنانے پر زور دیا۔
