مچھر آخر کچھ لوگوں کو ہی زیادہ کیوں کاٹتے ہیں؟ حیران کن حقیقت سامنے آگئی!

لاہور( پاک ترک نیوز) کیا آپ نے کبھی سوچا ہے کہ مچھر بعض لوگوں کے پیچھے ہی کیوں پڑ جاتے ہیں؟ سائنسدانوں نے اس راز سے پردہ اٹھا دیا ہے۔
ماہرین کے مطابق مچھر ہر انسان کو ایک جیسا نشانہ نہیں بناتے۔ وہ سب سے پہلے سانس کے ذریعے خارج ہونے والی کاربن ڈائی آکسائیڈ کو محسوس کرتے ہیں۔ اسی وجہ سے ورزش کرنے والے افراد، حاملہ خواتین اور زیادہ وزن رکھنے والے لوگ مچھروں کو زیادہ اپنی طرف متوجہ کرتے ہیں۔

تحقیقات میں یہ بات بھی سامنے آئی ہے کہ "O بلڈ گروپ” والے افراد مچھروں کی پہلی پسند بن سکتے ہیں۔ ماہرین کے مطابق ان کی جلد سے خارج ہونے والے مخصوص کیمیکلز مچھروں کو جلد اپنی طرف کھینچ لیتے ہیں۔
اس کے علاوہ پسینہ، جسم کی بو، زیادہ جسمانی حرارت اور گہرے رنگ کے کپڑے بھی مچھروں کو متوجہ کرتے ہیں۔ جبکہ کچھ خوش نصیب لوگوں کے جسم سے ایسے قدرتی مادے خارج ہوتے ہیں جو مچھروں کو دور رکھتے ہیں۔

تو اگر مچھر بار بار صرف آپ کو ہی کاٹتے ہیں تو ہوسکتا ہے اس کی وجہ آپ کا بلڈ گروپ، جسمانی کیمسٹری یا لباس ہو!